يا سنية ليه بعتي الحلق
من غير ضمان على الورق
علشان بهية تعيش يومين
ازاي تعيش وحقها بيتسرق
دي شابت في عز الخَضار
وقلبها من الهموم بيتحرق
بهية تاهت خطوة حلمها
في طريق نهايته مفترق
ضحكو عليها غصب عنها
سكة ندامة من بين الطرق
يا سنية ضاع تمن الحلق
والشط اوشك على الغرق
مش باقي غير خيط رفيع
يلم توب مليان رقع
يغطي جرح في قلبها
يمسح جبينها م العرق
فينك يا عم الشيخ صلاح
شمر ونادي حي ع الفلاح
وارمي على عنيها القميص
يرجع لها النور ف الحدَق
صب لها من كاس الامل
يا بهية منه بلي ريقك
وقومي اتوضي من جديد
و استعيذي برب الفلق
يا بهية قومي الفجر بان
شقشق بنوره ع الغيطان
جايب معاه الحلم البعيد
يكتب بايده ع الحيطان
يرسم سبع سنابل مليانين
والنيل يفيض تاني حنان
وترجعي من تاني صبية
تقطفي بايدك طرح زرعك
لاجل ما يعود لسنية الحلق
بدوي محمد
الجمعة 11 مارس 2022
ليست هناك تعليقات:
إرسال تعليق