"رسالة إلى أمي"
--------------------
من يوم ماسبتيني ياأمي
مبقيتش عارف اروح لمين
والجأ لمين اشكيله همي
ياأمى فاض بيا الحنين
مين اللى هيطيب خاطري
لو يوم بقيت مهموم وحزين
من يوم ماودعتِي الدنيا
والروح بتشكي وجع وأنين
بَعدِك ياأمى بقيت حيران
وجوه حِيْرْتِي صبحت سجين
أنا فاكرك وانتي مَسكاني
وتعرفيني طريقي منين
ولما كنتِي بترقيني
تحميني من شر الشياطين
وتعلميني أصول ديني
قلبك ياأمى عليا أمين
مشتاق لحضنك وحنانك
واحلف ياأمي ألف يمين
دانا روحي بتنادي عليكِي
ودموعي نشفت جوه العين
وحشاني واللهِ ياغالية
ياأغلى من كل الغاليين
ياريت تسامحيني ياأمي
واتمنى أقدر اوفي الدين
وكل يوم أدعي لربي
يجمعني بيكِي ف يوم الدين
--------------------------------
بقلمى....
م/ محمود الحريرى
ليست هناك تعليقات:
إرسال تعليق