بلاش ترحل
**********
انا ما بيدي اكون ساحر
وأفرك ع الفانوس والاقيك
ولا طير فى السما مهاجر
اطير وأحط ابص عليك
انا جوايا شوق قادر
يجيبك لو فى جب داريك
ودايما ربنا جابر
بعطفه ورحمته يراضيك
ياحب العمر ما تسافر
وجنب القلب هنا خليك
نداوي الدمعة بالفرحة
وضحكة قلبي تملي عنيك
ياطيف ضلل على سنيني
وشوق عشته على اراضيك
رسمتك ضي والاقيني
بضيك نور ومن حواليك
انا العاشق ومش فارق
تجيلي والا اجري عليك
بلاش تبعد ولا تهاجر
داويني باللقا واداويك
ونحضن شوقنا ونعافر
واعوم واغوص فى سحر عنيك
بلاش تبعد ولا تسافر
راعيني بالوداد واراعيك
انا شطك ولا ح أغادر
دروب الشوق دي ليا وليك
بلاش تبعد حبيب قلبي
انا بناديك وقلبي
شاريك
***********
جمال على الشرقاوى
شاعر العامية
مليج منوفية
ليست هناك تعليقات:
إرسال تعليق