ديك عشتنا نافش الريش
مهما يأدن ما يصليش
لو ديك غيره قايم يادن
ينزل فيه طوالي تلطيش
وحده بس فاهم الشرع
مذهبه حده غيره مفيش
كل ديوك العشش التانية
فى نظره حبة ملاطيش
آخر الليل يقوم و ينادي
كله ينام يا حبة براطيش
لولاي كان التعلب صادكم
من غيري فراخكو إزاي هتعيش
كل ديوك الحارة تكاكي
إللي يخالفه يلزمه فيش
يثبت حسن النية الصافية
قبل مصيره يكون تهميش
صورته تبقى للذكرى الخالدة
بوستر أكبر جوه أفيش
ديك عشتنا ديك مغرور
متخفي فى لبس الدراويش
وحده فوق المنبر يوعظ
فى
حضرته ابدا تِفتيش
لو ديك عن حضرته غاب
عشته تتعرض للتفتيش
ويا ويله اللي يخالف أمره
تلقاه ماشي منتوف الريش
كل ديوك الحارة تبوس جناحاته
ليهم ابدا مايوطيش
مرة شوفت الديك الرومي
منه جاي بيشحت عيش
كل فراخ حارتنا جميعا
بتغنيله إن شاء الله تعيش
بدوي محمد
الاثنين ٢٨ مارس ٢٠٢٢
ليست هناك تعليقات:
إرسال تعليق