أهـلا رمـضـان
كل عام وانتم بخير
فاضل بكره ويجينا رمضان
شهر الإيمان أهو هلّ وبان
حمدا لله إحنا بلغناه
والخير هالل بقدومه كمان
أهلا رمضان
...
نوّرْت علينا ياشهر صيام
شهر الإحسان شهر القرآن
وقلوب عامره صاحية ماتنام
مابين تراويح وصلاة وقيام
أهلا رمضان
...
شهر الفقرا شهر المساكين
بهلال رمضان عادوا الضالين
رجعوا لتواب غافر ورحيم
حنّان منّان على عبده كريم
لو شاف دمعة م العين نازله
طالبة الرحمة يرحمها قوام
أهلا رمضان
...
وانت ياعاصى مش ناوى تتوب
بتقول مكسوف غرقان فى ذنوب
وظلمت الناس وأكلت حقوق
إزاى ربى يغفر ذنبى
ودا مش واحد دى ذنوب وذنوب
...
قوم بس إتشجع واتطهر
واتوضى وقوم إنوى وكبّر
واركع واسجد وادعى لربك
يقبل توبتك
حتشوف الرضا
جوا فى قلبك
وساعتها تزول كل الأحزان
أهلا رمضان
...
وانتوا يا أصحابى ياللى معانا
عودوا لرحمان صوموا ويانا
واقروا القرآن
زوروا العيان
ساعدوا الغلبان
إطعموا جوعان
واحسنوا للناس
حبا وحنان
دا احنا فى رمضان
رفعت محفوظ-الاسكندرية
ليست هناك تعليقات:
إرسال تعليق