سجال 😥عدى وفات 😥
بقلم مهندس/ محمود الحريري
والشاعرة/ صفاء الخواجة
🌹🌹🌹🌹🌹
أ. صفاء
لسه امبارح كنت معاه
حب وشوق وليالي ملاح
نجري ونلعب ونعوز بكره
ييجي بفرح وكله نجاح
م. محمود
من كام يوم كانت ضحكتنا
تشفي قلوب من اي جراح
كنا بنلعب قدام بيتنا
عمر الفَرْح ماسابنا وراح
أ. صفاء
كنت أحكي له أنا عن أحلامي
عن تحقيقها ف قلب هواه
كان بيطمن قلبي وروحي
إنه معايا وأنا... وياه
م. محمود
كنا بنحكي ساعات وساعات
عن أحلامنا وعن أمانينا
وبنقضي كل الاوقات
والأفراح دايماً حوالينا
أ. صفاء
دايما كان يهاودني ويسمح
إني أسابقه ف كل نزال
فجأة لقيته اتأخر حاله
بقى يعاتبني وكله هزال
م. محمود
كان العمر زمان مهاودنا
ونسابق دايما ايامنا
بس بسرعة العمر سبقنا
واتغير وكمان غَيَّرنا
أ. صفاء
مرة ندهني وقالي تعالي
أنا مبقتش خلاص خيال
عمري أتقدم وكمان ضعفي
بان ومواجعي ف كل مجال
محمود
كنا زمان دايما بنعافر
كنا نسد ف اي مجال
مشوارنا نكمله للآخر
مهما نقابل من أهوال
بعد ما عدى العمر وسافر
صبح الحال مش هو الحال
صفاء
أنا من خوفي قعدت أسمع له
أصلي نسيت وده عمره ساعات
واتمنيته يعود .. يرجع لي
ليت شبابي ما عدى وفات
محمود
مش هنقاوح ولا هنكابر
أجيال بتسلم أجيال
رب الملكوت هو القادر
يصلح لعبيده الأحوال
أ. صفاء
كل كلامنا فى كان يازمان
امتى العمر ده عدى وفات
سابنا ف عز ...ما نتمناه
حتى الحلم نسانا ومات
م. محمود
فجأة لقينا العمر يعدي
وبسرعته مبيستناش
ولا بيبطأ ولا بيهدي
وبينتهي وكأنه مجاش
زي القطر بسرعة يعدي
بس القطر مهوش قشاش
دمعة بتنزل تحرق خدي
وتقولي الدنيا متسواش
أ. صفاء
أيوه العمر بيجري بسرعة
وأسأل نفسي سؤال عارفاه
امتى ده عدى وامتى ده فات
لسه ضفيرتي وتايهة معاه
لسه بجوه العمر . براءة
قطر الحلم أنا بأستناه
ييجي يعوض صبر شقايا
أملي وروحي كمان عاشقاه
م. محمود
لازم نعرف قيمة اللحظة
إحنا وصلنا خريف العمر
ونعيش يومنا لحظة بلحظة
اصل الوقت بسرعة يمر
ناخد من تجاربنا العبرة
وهنتحلى كمان بالصبر
صفاء
مين يساعدنا نعيش اللحظة
لسه بندي .. حياتنا عطاء
مش بإيدينا نعيشها وننسى
ناسنا وروحنا سواء بسواء
*****
بقلم الشاعرة/ صفاء الخواجة
والشاعر/ محمود الحريري
ليست هناك تعليقات:
إرسال تعليق