( ياميت خسارة)
"""""""""""""""""""""
ياميت خسارة على السلام
خلوه عبارة عن كلام
لما قتلوه بالمدافع
واندفن تحت الركام
ياميت خسارة على الحمام
لما ضربوه بالسهام
لما نصبولُه المشانق
واندبح بإدين لئام
ياميت خسارة على الأمان
لما ضاع وسط الزحام
نشروا الخراب جوه الديار
والبوم بينعق في الظلام
حرقوا المزارع والغيطان
في كل مكان زرعوا الألغام
لاجل الخوف يسكن فِ قلوبنا
ونكون في نظرهم أغنام
بس احنا منعرفش نخاف
من إرهاب أو من إجرام
هنكمل والمولى ساندنا
ومفيش هدنة ولا استسلام
كلمتنا تكون دايماً واحدة
من غير أي خلاف وخصام
بكره الشمس هتطلع تاني
ونشوف السما فيها حمام
والحق هيرجع لصحابه
ويبقى حقيقة مش أوهام
-------------------------------
بقلمي؛ م/محمود الحريري
ليست هناك تعليقات:
إرسال تعليق