بمناسبة الحلقة الرائعة التي قدمتها الشاعرة المتألقة أ. Safaa Elkhawaga
عن شوارع بورسعيد..
يسعدني ان أقدم لكم قصيدتي المتواضعة
#"بورسعيد بلدي"
----------------------
دي بورسعيد بلدي.. وعايشة جوايا
وحبها ف دمي.. وعشقها حكاية
*****
القعدة ع الممشى.. والبحر قدامي
وهواه يرد الروح.. يمسحلي أحزاني
*****
أيام وبتعدي.. وتاريخها كله نضال
وبإسمها نغنى... ماهي مصنع الأبطال
*****
وولادها رجالة... والعزم في قلوبهم
ويدافعوا عن أرضها.. يفدوها بحياتهم
*****
البورسعيدي الجدع.. معروف ف كل مكان
وبيعمل البدع... ولاعمره باع أو خان
*****
صحصحلي واسمعني..دا كلامي كله جميل
ع السمسمية نغني.. ونقول كمان مواويل
*****
بنشجع الكورة... وبنعشق المصري
ومعاه في كل مكان.. بِنْلِف وبنجري
*****
جوه الكنال ماشية.. مركب مع سفينة
لنشات كمان راسية.. ياسلام على المينا
*****
صيد السمك غية.. نصطاد ف أي ميعاد
نركب معدية.. ونروح على بورفؤاد
*****
ياسلام على الوقفة.. قدام مكان دليسبس
تلقى الكنال والبحر.... منظر يسر النِفس
*****
ماتيجى نتمشى.. نوصل لطرح البحر
ويلا نتعشى.. نسهر كمان للفجر
*****
باتروس مع مرحبا.. والسهرة في الكروان
والأوبرا والمكتبة... وجمال في كل مكان
*****
ندخل بقى ع البلد...نلقى ميدان شهداء
ومسلة تحكي التاريخ.. والنصر ع الأعداء
*****
شارع محمد علي.. والكوبري والرسوة
وقهوة الفلاح... مع فنجانين قهوة
*****
شارع الحميدي منين.. فين التجاري كمان كسري مع الأمين..منشية أحلي ميدان
*****
عاوزين نروح البزار... ونجيب لحوم وخضار
دا الخير ف كل مكان.. إياك تكون محتار
*****
نفسك في أكلة سمك... سوق السمك تحفة
هتلاقي فيه العجب... وتلاقي ١٠٠ وصفة
*****
خيرك يابلدي كتير.. بيكفي وزيادة
أدعي تكوني بخير..وتعيشي في سعادة
*****
أنا بورسعيدي أصيل...بعشق تراب بلدي
ملهاش ف عيني مثيل.. وأغلى شئ عندي
*****
ياساكنة جوه وريدي.. وف قلبي من بدري
وقبل مااكون بورسعيدي.. أكيد أنا مصري
---------------------------------------------------
بقلمي : م/ محمود الحريرى
ليست هناك تعليقات:
إرسال تعليق