🌼شيش موارب 🌼
شيش موارب يستُرنا..
وقاعدة حلوة وطبلية..
وأم من بعد فطُورنا...
تقعد تخرط ملوخية....
....
ناكل ونسمع لمسلسل...
إسمه ليالي الحلمية...
وفوق سطوحنا كام فرخة...
وديك بيصحى الفجرية....
....
وأب يرجع من شغله...
شايل جريدة وبطيخة...
ضحى بحياته وبعمره...
علشان حياه حلوة مريحة...
....
أم بسيطة فى تعليمها...
لكن يا زين تربيتها...
تحس لما تكلمها..
بإن كلية ف بيتها....
.....
دلوقتي أجيال مش هي...
ولا حد عارف مصلحته...
سهر لحد الصبحية...
ولا حد ناجح ف علاقته...
.....
القدوة رمضان أو بيكا...
والأخت رضوى وافكارها...
أسوأ واردأ مزيكا ...
الكل رافض ادوارها..
....
بقينا أمة تعبانة...
إنتاجنا مش كافي الحاجة...
سنين وهى نعسانة...
أخرها نكتة وسذاجة.....
....
إمتى نفوق أمتى نصحصح..
قبل الندامة ما تصبنا...
الكون بيجرب
وبيرمح..
وإحنا بنغرق ف عيوبنا..
كلماتى علاء محمود
ليست هناك تعليقات:
إرسال تعليق