. فاكره بجد
****
كنت فى يوم ماشي بتغندر
رحت مكان له ف قلبي كيان
وكمان هو ف نفسي وقلبي متقدر
خَرجِت إللي بلف عشانها
وقالت لي أنا جيت على بالها
ومر شريط كامل بخيالها
قولتلها دي كات أجمل أيامنا
فاكره زمان ؟
لما كنا بنسرق نظره
من تحت ستار
وإنتِ تلفي الكون بعيونك
خايفة يشوفنا أخوكِ فلان
فكره زمان ؟
لما ركبنا مع بعض المركب
كنا ف رحلة مع جوز خالتك
عَجَل ركبنا وكورة لعبنا
وإتزحلقنا وإتشقلبنا بالمراجيح
كان يوم حلو منستهوش
فاكره زمان ؟
لما روحنا ف يوم المولد
وقعدنا على شط الترعة
والناموس لافف حوالينا
واكل ماصص شارب دمنا
واحنا بنحكي ولا همنا
وسعادة كات مالية قلوبنا وكمان وشنا
ودموعنا تحت جفونا بتضحك لنا
وعيونا بتلمع ف ظلام الليل
فاكره زمان ؟
لما قابلتك جوه الجامعة
وإنتِ سِكِتي وإتسمرتي
ووشك جاب عشر ألوان
وأنا قصادك بقيت محتار
فاكره زمان ؟
لما طلبتك زوجة من والدك
وإنتِ رفضتي تقولي قرار
حياءً جايز كسوفاً يمكن
لكن ابوكِ رفض ب إصرار
وقالي خلاص بطلنا هزار
بنتي صغيره ع المشوار
مشيت أنا وحدي طريق جبار
وقلبي ب يعصره ألم ومرار
ومر أيام وشهور وسنين
وإنتِ في عقلي ووجداني
وبعد العمر دا كله أنا جيت
أقولك عمري في يوم ما نسيت
إنك إنتِ الشوق والعشق
إنتِ نسيم الروح والقلب
بس قوليلي فاكره بجد ؟
فاكره زمان ؟
ولا أنا عايش أضغاث أحلام ؟
**********
تحياتي
مرسي محمد
ليست هناك تعليقات:
إرسال تعليق