🥀للحديث بقية🥀
1/ لما نغيب عن بعض مدة طويلة وابدأ أنا بالزيارة متقعدش تقطم فيا وتقولي تو ما افتكرتنا! وأخيرا جينا على بالك والكلام اللي مالوش لازمة ده
(زي ماعندك ظروف أنا كمان عندي ظروف وبعدين كنت وريني وابدأ انت الأول بزيارتي).
2/ لما تسمح ظروفي واسأل عليك بالتليفون برضه بلاش اللوم والتقريظ وليه مش بتسأل وفينك من زمان وبعد شوية تقطع المكالمة بحجة معلش معايا ويتنج أو المدير بينده عليا أو معلش نسيت حاجة على النار وهابقى أكلمك تاني وتغيب شهور متكلفش نفسك مكالمة ولما أنا تاني أكلمك تعيد نفس الشيء معايا
(مش ح اعبرك بعد كده أنا مش تقيل على حد ولا أحب أكون كده وعندي دم بيجري فى عروقي زي اللي عندك مش عصير طماطم)
3/ لما نعمل فرح والقاعة تقيدنا بعدد من المدعوين ونضطر ناخد من كل أسرة فردين أو تلاتة بلاش حرق الدم والزعل والعتاب. أنت ليه معزمتنيش هو أنا مكنتش ح أقدر أجيب هدية والا مكنتش ح أشرفك.الموضوع مش كده خالص . ربنا يعلم بالماديات وظروف كل أسرة إزاي لازم نراعي بعضنا (وبعدين يا أخي هو لازم أعزمك عشان تبارك لي فين التليفون أو زيارتك ف البيت. وعلى كل كل حال متعزمنيش ف مناسباتك ونبقى خالصين من غير كلام مالوش لازمة).
4/ لما أعزمك على غدا أو عشا .الجُودة بالموجودة ياسيدي وبلاش تطلع تشنع على بيتي وأهل بيتي وتقول ده أنا لما بأعزمهم بأعمل وبأكلف (بناقص غداك أو عشاك يحرم عليا اللقمة عندك)وعلى فكرة برضه م أنا بأكلف بس مش لازم قصاد الديك الرومي بتاعك زيه .. البط والأرانب برضه مش رخاص.ومش لازم قصاد الدنيس أجيب زيه .المياس برضه غالي وبعدين خليها من باب التغيير.
5/ ولادي فى مدرسة خاصة إنجليزي إضافي وولادك في مدارس دولي بلاش عيالك يتنططوا على ولادي مين يعرف يمكن ولادي هما اللي يكونوا متفوقين(من تواضع لله رفعه).
6/ بلاش الزيارات المفاجأة متعرفش ظروف البيت إللي أنت رايحه إيه وعندهم إستعداد لاستقبالك والا لأ وبلاش القمصة ع الفاضي والمليان (وتذكر ديننا ورسولنا الكريم صلى الله عليه وسلم أمرونا بالإستئذان ولو أصحاب البيت ردوك عن الزيارة لظروف عندهم عادي نتقبل أعذارهم وبلاش تشنع وتقول مش بيحبوا حد يروح لهم ).
7/ راعي آداب الزيارة ولا تتبع عورات البيت وراعي لو سيدة وحدها بالبيت أختار من المحارم من يكونوا معك أثناء الزيارة وبلاش التعدي على حدود الله (هي مش ناقصة متاعبك اللي ح تجلبها عليهم)
8/ لما أنصحك وألفت نظرك لخطأ ترتكبه أنت أو أولادك في حق الدين أو المجتمع.لاتتهمني بالرجعية وفرض الرأي وتقاطعني لأني موقفتش جنبك بمناصرتك على الخطأ (أنت مش ح تقف بدل مني قدام ربنا يوم القيامة وأنا اللي ح اتحاسب على إني لم أنصحك)
🌹أأقول كمان والا كفاية .قدامنا حاجات كتيرة بدأ البعض يشكي منها والدنيا تعبت الجميع ومش ناقصة حد تاني يضيف للآخر متاعب.
🌹البوست مش مقصود حد بعينه والله عشان محدش يتفزلك وينتقد إنما كتبته من شكاوي حولي كثيرة.
ولسه للحديث بقية
🥀بقلمي/ صفاء الخواجة 🥀
ليست هناك تعليقات:
إرسال تعليق