💓 نعمة الحب 💓
سجال دويتو
بين الشاعرين..
م. محمود الحريري
أ. رضا البوشي
------------------------
🌹محمود
الحب ده أعظم نعمة
موجودة في أي زمان
بيخلي حياتنا جميلة
وينور كل مكان
يزرع في قلوبنا الرحمة
ونعيش بسلام وأمان
🌹رضا
الحب ده أجمل طفل
مولود في قلب الكون
يزرع أحلام في العتمه
بالألف والمليون
وصوابعه طبيب بيداوي
والحزن معاه بيهون
🌹محمود
أعظم أنواع الحب
حب الأم لأولادها
قلبها مليان بالرحمة
ومفيش مخلوق في حنانها
بتنور دايماً دنيتنا
وهي حياتنا بأكملها
وإلٰه الكون كَرَّمها
والجنة تحت اقدامها
🌹رضا
أعظم حب تشوفه يا عمي
حب الأم ياناس لعيالها
تاخد من عافيتها وتدي
ولا يوم قفلت حتى بيبانها
و عينيها شلال من نور
حتى حنانها بيملا بحور
اما عليها ضحكه تجنن
يحلفو بيها كل جيرانها
🌹محمود
أنا مهما حكيت عن حب
مفيش غير حب أمي
وأحن حضن لقيته
بيزيح أوجاعي وهمي
دايماً متعلق بيها
وحبها يجرى فى دمي
و أبويا الغالي حبيبي
سندي في حياتي وأملي
🌹رضا
انا لو حكيت عن امي
احتاج م الدنيا سنين
في الدنيا الواسعه تشيلني
وبطير من غير جناحين
وابويا رغم التسعين
لو جزمته نايمه ع الباب
تتطمن وتنام العين
🌹محمود
أنا لما كبرت شوية
ودخلت كمان مدرستي
وقرينا عن الوطنية
ومصر الغالية حبيتي
وهويت بلدي وحبيتها
حُبِّي لأهلي ولعيلتي
وعشانها أضحي بعمري
و احميها بكل عزيمتي
🌹رضا
ودي مصر حبيبتي الغاليه
كبيره العيله
في ايديها جناين ورد
وعنيها ضليله
من يوم ما اتخلقت
وهيا عايله الهم
و شايله الشيله
بهواها صبيه عفيه شقيه
بحر من الحنيه
بشتاق لو قلبي غاب عنها
ثواني دقايق
واموت لو غابت عني
في ليله...
🌹محمود
ولما كبرت ودق القلب
لأول مرة عرفت الحب
أول ما لقيتها قصاد عيني
قلبي عشقها وبَدَأْت أحب
واتمنيتها شريكة لعمري
واطلب إيدها وأنول القُرب
🌹رضا
أول مره فيها انا شفتك
عقلي اتجن وقلبي ارتاحلك
غصب عني لقيتني بحبك
شديتي قلبي لوحده فتح لك
اول مره الشوق يغلبني
حتى في عز الحيره بكتب لك
رمشك زي بنات الحور
لا البحتري ولا المتنبي
يقدروا على وصفك
🌹محمود
الحب دا أجمل غنوة
مصحوبة بلحن جميل
ياما قالوا ف الحب قصايد
وغنوا كمان مواويل
واللى محبش في حياته
مسكين.. وقلبه عليل
هيعيش طول عمره لوحده
يسهر.. ماينام الليل
🌹رضا
ياللي طلعت القمر
وعرفت أسرار النجوم
ياللي بتقرا الكف والفنجان
وضليع في فن العوم
الحب ايه شكله ووصفه
ونعمل ايه لما نقابله في يوم
🌹محمود
بيقولوا الحب نظرة
تيجى وراها ابتسامة
وكلمة تجر كلمة
بيسيب في القلب علامة
والقلب ف لحظة بيعشق
ومفيش في الحب ملامة
🌹رضا
بيقولوا الحب لمسه
بتداوي كبير مجروح
لقا وحنين وغياب
وروح تقابل روح
حتى العصافير لما بتعشق
المسك منها يفوح
🌹محمود
أنا لما عرفت الحب
وصبحت من العشاق
والحب رسخ في القلب
وبقيت دايماً مشتاق
بالليل أسهر وافكر
ونهاري هوى واشواق
🌹رضا
انا اللي فطاري كان حبه غزل
وكان غدايا وعشايا الحيره والااشواق
وانتي الاميره الجميله كيلوباترا
في دوله العشاق
لا البعد يقدر علينا ولا يمنع هوانا
ولا حتى الف فراق
🌹محمود
فيه ناس في الحب اتهنوا
وناس اتعذبوا
وناس الحب جمعهم
وناس اتغربوا
وناس قلوبها صافية
من بعض يقربوا
وناس قلوبها قاسية
هما اللي بيهربوا
🌹رضا
في ناس هربت م الحب
وتعبت من اول جوله
وقلوب عملت م الحب
شوارع ومباني ودوله
وقلوب قبل ما تعشق كانت سوده
احلوت وابيضت من اول نوبه
وقلوب الحب خبط على بابها
من كتر الخوف تتمنع وتقوله استنى
🌹محمود
حكايات الحب كتيرة
علي كل شكل ولون
حكاياته عايشة معانا
وبقالها قرون وقرون
وكتير عشاق في هواهم
بيقاسوا عذاب وشجون
وحبايب عاشوا واتهنوا
وغرامهم يملا الكون
🌹رضا
على رأي ثومه وعبد الوهاب
الحب ده جنه جواها الف عذاب
عصفور من غير سور
وعجوز بيلف كأنه شباب
يا ما انكتبت عن معانيه
الف قصيده والف جواب
مهما قاسينا كتير لياليه
وغيابه عنا يبقى عذاب
🌹محمود
أعظم حب في كل الدنيا
حب رسول الله وهادينا
حب محمد مالي قلوبنا
وينور ضلمة ليالينا
صلى الله عليه وسلم
هو حبيبنا وضى عنينا
هو شفيعنا عند خالقنا
للجنة هياخد بإيدينا
🌹رضا
يا محلى حب النبي
على طرف كل لسان
حتى الصلي ع النبي
بتحلي كل مكان
يابخت من يدوق حب النبي
تشوف عنيه الشهد
والسعد بالالوان
فاز بالرضا في دنيته
والبركه نايمه ف فرشته
وف آخرته فاز بالشفاعه والجنان
🌹محمود
لولا الحب مكناش عشنا
ولا حسينا بطعم حياتنا
ولا شفنا الأزهار بتفتح
ولا طير بيغنى ويسعدنا
ولا كانت أيامنا تعدي
ولا حققنا شئ لولادنا
بالحب نحقق أمانينا
وتنور دايماً دنيتنا
بالحب نعالج أحزاننا
والفرحة تزيد مع لمتنا
🌹رضا
لولا الحب ما كان في ربيع
ولا سمعنا ضحك الازهار
ولا شفنا اللمه في العيد
اصل الحب ياناس جبار
بيخلي الموج النعسان قلبه يدق
ويعشق قلب البحار
والرمل الناعم بسلامته
بايت وسط الاحجار
لولا الحب جوه قلوبنا
كنا بقينا شويه تبن عضم ف قفه
ولا عدينا نجوم اليل
و كتبنا احلى الأشعار
🌹محمود
وفي الختام ألف تحية
وابعت لكم من قلبي سلام
واتمنى الحب يجمعنا
ويبعد عنَّا أي خصام
نملا قلوبنا خير ومحبة
ولا نشتكي من أى ألام
وسلام بيرفرف حوالينا
ونحقق كل الأحلام
------------------------------
بقلم؛؛
م. محمود الحريري
أ. رضا البوشي
ليست هناك تعليقات:
إرسال تعليق