حول العالم
إسمي الرسمي المدعو فلان
أصلي وفصلي يادوب إنسان
لا جدي الأكبر كان علي بابا
ولا أبويا كان يوم م الأعيان
علشان طعم الواقع مر
أسرح بخيالي وأشوفلي ممر
وأحلي المر بحلم جميل
وأهي الأيام كدا كدا بتمر
أركب سرج خيالي وأطير
رأسا إلى دنيا الأساطير
أطلع م السند أدخل ع الهند
أغني وانام أنا ع المسامير
أروح أمريكا أمسك أستيكة
ألعب بلياردو أسمع مزيكا
وجايز برضو أتشاقى شوية
بس دا سر مابينا ياويكا
أروح أسبانيا وأصارع الثور
أجدع من أجدع ماتادور
وافضل أحاور حبة وأناور
ألقى الثور بيلم الدور
ومن أسبانيا في لحظة وثانية
أفلفص منها أنا على ألمانيا
وأشوف تصنيعهم ليه في مصانعهم
فاق كل البلدان الثانية
وفي أسكتلندا أنا هنفخ قربة
وألبس جيبة وهمسك حربة
وأرجع على مصر المحروسة
لما أشتاق وتاكلني الغربة
ولما أصحى من الحلم بعيش
واحد من ضمن الحرافيش
أتزق و أزق أعوج في البق
لجل ماأعيش وسط الألاضيش
بقلم طارق السيد
ليست هناك تعليقات:
إرسال تعليق