بصوا يا ناس
بصوا ياناس على واد مسكين
عايش في خيمة اللاجئين
ملقاش حد يفكر فيه
وكل الكون عنه لاهيين
كل أهل الكون نسيوه
وافتكره رب العالمين
قاعد ع الأرض ومقعمز
وبيحلم بتلات بطاطين
ليه ياناس تسيبوا أطفالكم
فى البرد يموتوا جعانين
ربنا بكره هيحاسبكم
لما تقابلوه يوم الدين
ياحكام العالم أصحوا
خلوا عندكم رحمة ودين
أول ناس تتحاسب أنتم
علشان أنتم مسئولين
على كرسي الحكم تتشاجروا
واتسلحتوا بالملايين
الحراس واقفين على بابكم
وجوه قصور في الدفا عايشين
أما الشعب بتاعكم أصبح
لاجيء في كل الميادين
ربنا وصانا بالرحمة
وأنتم لدينكم ناسيين
أطفالكم بتموت بسببكم
وأنتم ليه عنهم لاهيين
مهما قُلت لا يمكن أعبر
عن حسرتي على ناس مساكين
ربنا بس وحده قادر
يبدلكم بناس تانيين
يكون فى قلوبهم شوية رحمة
ويرحموا أطفال مساكين
بصوا يا ناس على واد مسكين
لا حول ولا قوة إلا بالله
وهبه البوهي
ليست هناك تعليقات:
إرسال تعليق