أنا والبحر
وقفت على شطك قاصد عتاب الأحباب
موجك خطف حبي مش أحنا كنا صحاب
طول عمري همومي معاك مقفوله بالترباس
يا بحر حاضن دموعي وأرتحتلك عن ناس
ضميرهم مات بيعاملوا الحب بالتجريح
نظراتهم غدر وخيانه وكل مكان تلاقي جريح
وكل جريح وله قصه رواها الدمع ف عيونك
أحساسي رق على قلبي وقال البحر ما يخونك
حكيتلك وفتحت لك قلبي ياموج البحر أسمعني
سنين العشق مكتوبه ومر البوح بيمنعني
أخاف أنطق وأبوح بالشعر وألاقي الرد يوجعني
بداري مشاعري جوايا وأرضى بعيشة المضطر
وروحي مفارقه لسمايا وقلبي للعذاب أضطر
عذاب القلب يتخبى وكفايه طيفُه يكون جنبي
وموج البحر يتعالى ويقولي صعبت على قلبي
غرامك صعب يامجروح وصعب تخبي ألامك
مكتوب الدمع فين ماتروح حبيبك صورته قدامك
أنا موج للبحر متداري تمام والسر من بوحك
عاشق والبحر مش داري جراحى نبعها جروحك
ونصيحتي لقلبك الدرويش يعيش الصبر فى دروبه
مشاعرك بره متعديش وقلبك داري ف عيوبه
يا بلوة عشقك الصعبه وجبت لنفسك التجريح
مهو بحور الغرام لعبه فيها الخسران ياعينى جريح.
حدفت همومي فى جوفك يا بحر وأملي تبلعها
وقالي البحر دي حروفك تزيد الآه وما تمنعها
تداوي أزاي الجراح شطىدي وأنا أمواجي ميه بملح
على سنين الوجع خطي ياقلب من الجراح له طرح
عكرت ميتي الصافيه بجرح عجيب ملاني بهم
أنا اللى ميتي دافيه صبحت خلطه ليه بالدم
أمانه داري يامجروح فارقت الروح
بقت خلاص ولا تفرق أكم من الجراح وأكم
كلام البحر يماني وخلاني
أنا والبحر أعز صحاب
ورجعت أشكيله بالناي وأغنيله
ووقفت على شطك قاصد عتاب الأحباب
موجك خطف حبي مش أحنا كنا صحاب
كلماتى إبراهيم الحداد
ليست هناك تعليقات:
إرسال تعليق