عم يا شاطر
بيقولوا عليك شاطر وبتجبر الخاطر
علمني وصفة بسيطة وسهلة
أو حتى ضحكة جميلة بريئة نجبر بها الخاطر
لفيت كتير وشوفت كتير
وفي كل طريق بروحي بخاطر
أجبر بخاطر الغلبان
واللي من الشقا هلكان
واللي من المرض تعبان
يمكن القي حد يجبرلي الخاطر
لكن دائما مكسور الخاطر
لا إيد للجرح تداوي
ولا للحزن تداري
ولا علي القلب تحن
ولا قلب بالحب يمن
عم يا شاطر
قولي إزاي بتجبر الخاطر
تعبت من نفوس الحقد ماليها
وقلوب سودة بتغل في نفسيها
كل همها تعلي في نفسها
تدوس علي الغلبان
لا يهمه قرايب ولا جيران
ولا حتي صلة أرحام
وتقول أنا ومن بعدي الطوفان
ونسيت إن في ميزان
عند الملك العدناني
يفصل بين الناس وبعضيها
ياعم يا شاطر
قولي ايه يجبر الخاطر
في زمن كله مباح
النفاق والغش
وتلوين الوش
بماسكات ورتوش
وتتلون بمية لون ووش
تخدع وتخون
وگأنها ملكت الكون
ولا همها حلال ولا حرام
ولا بني الإنسان
المهم تكسب وتقش
تدوس علي رقاب الناس
وما عاد في تقي وإحساس
ولا خوف من الرحمن
المهم تملي الكرش
عم يا شاطر
قولي ايه يجبر الخاطر
قولي طريقه سهله وبسيطة
أو حتى ضحكة جميلة بريئه
يمكن تجبر لي الخاطر
هوى الإمام
ليست هناك تعليقات:
إرسال تعليق