"أحوال الناس"
سجال دويتو بين
أ. إسماعيل عبد الهادي
م. محمود الحريري
إسماعيل
احوال الناس غريبه
و احترت في أمرها
ياما شوفنا حاجات عجيبه
وشربنا مرها
الناس اتغير حالها
والكذب ف دمها
نسونا طعم الدنيا
وعيشها وملحها
محمود
أحوال الناس ياصاحبي
أصبح فيها العجب
الطيبة بقت عباطة
والحب كمان هرب
شوفنا الأخلاق انداست
وفساد بقى للركب
ومعدش فيه مبادئ
ولاعاد كمان أدب
إسماعيل
أهل الزمان ده ف حيره
عايشين ليه في صراع
زي السفينه. التايهه
في البحر من غير شراع
والشط راح منهم
والمرسا. راخر ضاع
والقسوه ملت قلوبهم
والغش بينهم. شاع
محمود
أحوال الناس اختلفت
مبقاش للرحمة وجود
والقسوة بقت شئ عادي
والخير بيروح مايعود
مبقاش فيه حد بيصدق
ولا حد بيوفي عهود
والكل يقول مصلحتي
هِيَّا أملي المنشود
إسماعيل
عيشنا وشوفنا وياما ح نشوف
لما الأبن يجافي. أبوه
مبقاش فيه للرحمه مكان
خلت عقلي معاها يتوه
دنيا وماشيه بالمعكوس
لما الخير كمان ينسوه
واللي قلوبهم ناسيه الرحمه
بكره الذل بحاله يشوفوه
محمود
شوفنا الصاحب بيخون صاحبه
شوفنا الأخ بيقتل اخوه
شوفنا القوي يفتري ع الأضعف
وابن بقسوه بيطرد أبوه
لو فيه واحد عنده مبادئ
بسرعة الكل بيعترضوه
لو بيدلس أو بينافق
بتلاقي الناس يحترموه
إسماعيل
يلا نشوف أحوال ف الماضي
ونشوف ناس كان ايه أحوالها
زرعوا ارض الخير بمحبه
طرحت ود زاد ف جمالها
كان الجار يسأل علي جاره
إن غاب عنه يشوف ايه جرالها
النهارده الحال اتغير
لو يوم شافه ما ح يعرفها
محمود
كان العيش والملح زمان
نعمة كبيرة بنحلف بيها
كنا نصون العشرة تمام
نتغنى بروحها ومعانيها
كان إخلاصنا لكل صحابنا
يسوَىٰ الدنيا وكل مافيها
واللى يخون العشرة ياويله
بتصيبه اللعنة وبلاويها
إسماعيل
آه من عشرة أهل زمان
وطيابة الناس وحلاوتها
زرعوا الود في كل مكان
والإخلاص بيزيد قوتها
كان الناس طبعها ألماظ
والحق تملي في كلمتها
النهارده الحال اتغير
والغش ماشي ف عشرتها
محمود
أهل زمان كانوا ناس هايلين
نادر لما تلاقي خاينين
كان الحب بيجمع بينهم
على نياتهم كانوا عايشين
وقت الفرح الكل بيفرح
وقت الحزن الكل حزين
لو فيه واحد عنده مشاكل
تلقى الكل معاه واقفين
إسماعيل
عندك حق ف كل كلامك
حال الناس كان جد ف جد
ولا كان خاين يدخل بينهم
لما عمايله تزيد ع الحد
واللي يخون الكل يحاسبه
واللي يشوفه م شافوش حد
كل الناس كان قلبها صافي
حتي كلامهم سيف له حد
محمود
كنا زمان بنخاف على بعض
كانت الرحمة فى كل مكان
دلوقت الأنانية انتشرت
والناس أصبحوا زي غيلان
تلقى الغني علشان مصلحته
بيمُص في دم الغلبان
ويقول لك وبكل بجاحة
أنا بس.. ومن بعدي طوفان
إسماعيل
غل وغيره مفيش احساس
والأنانية ماليا نفوسهم
حالهم فاق وحوش وديابه
كل الشر يبان ف عيونهم
أنا ح اتجنن من دا الحال
من اطماعهم من عمايلهم
حتي الرحمه اتشالت منهم
طحنوا عضم الناس بنيابهم
محمود
كنا زمان بنساعد بعض
كانت الضحكة بتملا الكون
كنا بنعرف حق الجيرة
وعمر الدم كمان مايهون
وبنكبر لكبير العيلة
أصل كلامه كلام موزون
رحمة ونور على أيام فاتت
ربنا لُه في الخلق شؤون
إسماعيل
احوال ياما بنتمناها
يرجع تاني كبير العيله
كان بيلم الشمل بكلمه
كان بيحل الأزمة بحكمه
لما نشوفه كان ليه هيبه
ياما علمنا اصول العشره
آه ياخساره وألف خساره
راحت فين ايامنا الحلوه
محمود
إحنا بقينا في زمن الفُرقة
زمن العيشة مع الأوهام
تلقى الواحد جوه ف بيته
عايش غرقان في الأحلام
لابيعرف حاجة عن العيلة
ولا يدخل في حوار وكلام
والبنت حياتها ف تليفونها
حتى بتحضنه لما تنام
والأب بعيد عن أولاده
والأم بتتعب ياحرام
إمتى تعود اللمة الحلوة
إمتى حياتنا تبقى تمام
إسماعيل
زمن اتغير حال الأسره
لما راح زمن الطبليه
لقمه هنيه كات تجمعهم
والضحكه طالعه بحنيه
كل مشاكل الكون تتحل
وبيتصالح ده مع ديه
أم واخت وخاله وعمه
وجد وأب وعيشه هنيه
شوف دلوقتي اتغيرحالنا
بعد وفرقه وناس مش هي
محمود
حتى التعليم حاله اتغير
بعد ماضاع منه التربية
والأستاذ مبقاش له هيبة
وكله عشان درس التقوية
والمستوى عمال يدحدر
وبنتأخر كل شوية
حتى خرجنا من التصنيف
ومخدناش غير خيبة قوية
إسماعيل
يعوض الله ع التعليم
بعد م راح زمن الكتاب
الاستاذ مبقاش له قيمه
فاتح سنتر له أبواب
فين الشرح علي السبوره
اللي صحا عقول مقفوله
والتربية قبل التعليم
واللي يقصر وقعته سوده
محمود
ربنا يرحم زمن العلم
والأستاذ داخل بعصايته
ويراعي ربنا وضميره
ويأدي عمله ف مدرسته
ولايستنى دروس خصوصية
وعشان واجبه يضحي براحته
كان للطلبة دايماً قدوة
وكانت ثروته هيَّ كرامته
إسماعيل
شوف الموضه شوف عمايلها
ماشيه البنت ع المكشوف
ناقصه بس تكمل رقص
يلا يا ابوها تعالي وشوف
لو بأيدي سلاح متعمر
اضرب فيهم بالمولوتوف
شوف الموضه شوف أحوالها
معدش فيها ياخلق كسوف
واللي مضفر شعره بتوكه
شكله جميل ولا بنت بنوت
تلقاه ماشي علي واحده ونص
راسه تستاهل ١٠٠ نبوت
محمود
أنا م الموضة هاشق هدومي
هاصرخ ومينفعش سكوت
إزاي شاب يضفر شعره
ويتنطط فشر الكتكوت
على جسمه هدومه هتتقطع
نفسي ياناس ادِّيلُه شلوت
ودي لابسة الجينز المتقطع
ناقص تمشي بورقة توت
ليه الحاجة الحلوة فاتتنا
ليه الحلو بسرعة يموت
إسماعيل
فين البيت فين التربيه
وايه وصلنا علي ده الحال
حال الدنيا ف ثانيه اتلخبط
ويا الموضه راحت أجيال
نفسي تعود الكلمه الواعيه
والبيوت يحكمها رجال
و أم شاطره تحاجي عليهم
تخاف عليهم من قلنا وقال
محمود
لما الحب يغطي حياتنا
ونلاقي الخير جوه قلوبنا
ربك يصلح من أحوالنا
ويبارك فينا وف بيوتنا
ونربي ولادنا على الرحمة
هتنور بيهم دنيتنا
ونرجع زي ماكنا زمان
وترجع ضحكتنا ولمتنا
إسماعيل
الحب زمان كان كلمه
وقلوبنا ....... بتغنيها
وعيون تقول كلام
وهمسه نحس بيها
ونسيم الليل لو مال
أرواحنا تميل عليها
والبدر فوق ف سماه
بياخدها ويطير
إسماعيل
الحب زمان كان كلمه
وقلوبنا ....... بتغنيها
وعيون تقول كلام
وهمسه نحس بيها
ونسيم الليل لو مال
أرواحنا تميل عليها
والبدر فوق ف سماه
بياخدها ويطير بيها
يرحم ربي حب زمان
وقلوب مات الحب فيها
محمود
الحب زمان كان نظرة
تلاقيها ف عين ولهانة
والنظرة بألف معنى
للهوي دايماً عطشانة
أول ماتشوف حبيبها
بتكون على طول هيمانة
والعين بالحب بتلمع
وتكون بالشوق مليانة
إسماعيل
دلوقتي الحب دليفري
ورقه ومكتوبه عرفي
وعيال بتحب. وتجري
ويومين وتفوت وتعدي
راح فين زمن الحبيبه
وأصول اندفنت بدري
ونسينا كل عادتنا
كان فين د ياناس متخبي
محمود
ليه الحب كمان اتغير
وليه أحواله بقت ماتسُر
فاكر الحب زمان وجماله
كان له شنة ورنة وسحر
حتى أغاني الحب زمان
كانوا كاتبينها ملوك الشعر
أما الحب بتاع دلوقتي
حاجة رخيصة وملهاش سعر
إسماعيل
شوفنا معاكم احوال ياما
فيها كتير مش عوايدنا
لما الدنيا ضاقت بينا
والسبحه انفرطت من ايدنا
والكبير اتقلت قيمته
لما اتقفلت عتبة بيتنا
والصغار ما لهمش كبار
وحال الناس بيزيد عيوبنا
محمود
أيام فاتت وسنين عدت
والأحوال كلها تتبدل
لكن ليه توصل للأسوء
لازم نسعى عشان تتعدل
لما نحافظ على تقاليدنا
عمرنا أبداً ماهنتبهدِل
لازم نلجأ للي خالقنا
واللى عليه دايماً نتوكل
نِخْلِص يلا النيه ونبدأ
علشان للأحسن نتحول
ليست هناك تعليقات:
إرسال تعليق