على شط النيل
عطشان يا صبايا
عطشان والنيل قريب
والدنيا حرّ ولعة
والنيل جنبي قريب
...
يا نيل يا أسمر يا غالي
ياما سهرت ليالي
تحرسني نجوم تلالي
تفكرني بالحبيب
...
سحرك أسر القلوب
وأنا قلبي فيك يِدوب
والفرحة تملا عيني
لما أشوفك قريب
...
دلوقت يانيل يا صاحبي
خايف م المستخبي
خايف على ذكرى حلوة
عايشة بقلبي وعقلي
وصبايا حلوة بشطك
بعيونها حنان بيروي
وآهات من قلبي طالعة
لما الحلوة تعدي
أنسج موالي طرحة
وأهديهالها بيدي
...
يا نيل يا أبو ميّة حلوة
ولكل حبيب بتروي
شفت عمايل الكبار
باعوك يا حلم عمري
وقصور ع الشط شاهدة
ماعادتش الميّة تجري
ورصاص خرج المصانع
وسموم فى الجسم تهري
حالفين لينشفوك
والميّة فيك ماتسري
وآخرتها مضوا وثيقة
من غير ما ياخدوا رأيي
بغباؤهم ضيعوك
وقضوا على حلم عمري
رفعت محفوظ-الاسكندرية
ليست هناك تعليقات:
إرسال تعليق