( ايه الحكاية)
قولي يابني ايه الحكاية
أصل نضارتى مش معايا
بيقولوا في لمة وزحمة
والناس جايه ورايحة
سامع سرينة إسعاف
بتقول وسع وسع
خد يابني ايدي عديني الطريق
مش انت يابني لابني الرفيق
قولي ليه هو مش معاك
و ليه فاتك ومجاش وياك
والا هو راح يجيب حاجات
هو عارف بحب الحلويات
أصل قلبه حنين زي سكر النبات
مهما أتخانق معاه ألقاه يراضينى
من سكات
أصل عارف ربه ويصلي كل الصلوات
هو بار بيا وبيحققلي الأمنيات
ساكت ليه يابني خد مني وهات
وليه الطريق بينا طال
وقلبى ليه موجوع يمكن كتر الكلام
والا عشان قلبي لابني أشتاق
وليه سامع صراخ بيقول راح زينة الشباب
شميت ريحة ابنى ميكونش عليا جاي
اوعى يابني تكون انت زينة الشباب
انت عكازي وضي العين
وانت الهنا ف حزن السنين
ااااااه والف ااااااه
يابني وانا اللي قلبي موجوع
اتاري دي بداية الرجوع
يارب لطفك بالعباد
واكفينا شر البعاد
وشر فواجع الطرقات
هوى الإمام
ليست هناك تعليقات:
إرسال تعليق