قلب طيب
_______
لِسّاك متبت فى اللى خانك
واللى باعك واشتراك
علشان يبيعك من جديد
لِسّاك بقلب ابيض نضيف
ولا نقطة سوده مغمقاه
فرحان وباين من بعيد
لِسّاك يا طيب لِسّه طيب
والقلوب اتغيرت حتى النفوس
إتقلّبت صابها الخراب
لِسّاك بتضحك لما بيقولوا النكت
دائما عليك
وتقوم وتفتح للى خانك الف باب
ما تفوق يا صاحبى من الهبل
ومن الطيابة الزايدة عن حد الهبل
إيّاك تفوق
شايل على ضهرك حمول تتعب جبل
وتقضّى يومك لقمتين ياك تتقبل
وتقبّ فوق
الدنيا دي دنية امل مش للقنوع
اللى اتوضع له اللقمة لأجل تسكّته
وتبكّته لو يوم نطق أو قال كلام
واللى رضى بقولة نصيب
أصل النصيب ده اللى اتوضع
له فى سكتة
ودى غلطته،ولا عمره يسأل
هو ليه أو ليه بكام
الدنيا دى دنية طموح لجسد وروح
مش روح تعالى تعالى روح
ويقضى عمره ما بين شقا
وما بين جراح
الدنيا دي دنية امل ،عايزه العمل
وإن كان على الجرح الجراح يوم تندمل
واهو بعد ليل اسود طويل
ييجى الصباح
شعر
عبد الرحيم على
ليست هناك تعليقات:
إرسال تعليق