و بحثت فيكي عن مكان
عن حضن للغلابة الشقيانين
مالقتش في حضنك امان
و لا عندك زاد للمحتاجين
باسطة الايدين للي باعوكي
و طريقك شوك للحفيانين
اللي زرعولك احضان أمان
و طعموكي وباتو هما جعانين
لسة قلوبهم طيبة تدعيلك
و ايديهم للسما تقول آمين
من الفجر رايحين الغيطان
كما ساقية بتلف من سنين
نسيتبهم في برد ليل الشتا
صابهم ضنا و زاد الأنين
بس لساتهم بيدعولك ف الصلاة
بصوت مليان شقا لحنه حزين
بس انت حارماهم لحظة فرح
و كاساتهم م الهموم مليانين
و هناك على شط الفرح
مالهمش أسامي في المعزومين
قوليلي من غصبك تجحدي
ترميهم من حضنك و تبعدي
مش برضه هما ولادك
ليه في حضنك متغربين
مش هما دول الغلابة
اللي بنوكي من سنين
طب أشكي لمين يام الغلابة
يام العطاشى المحرومين
طالت فيك سنين العذاب
و القلب داب مالقاش مكان
و لا حتى فيك حضن دافي
يرد برد الشقيانين
بدوي محمد
الأربعاء : ٢٧ من ديسمبر ٢٠٢٣
١٤ من جمادى الآخرة ١٤٤٥
ليست هناك تعليقات:
إرسال تعليق