زخانيق الحارة
ناوي أحكيلكم أحلى حكاية
من زخانيق دهاليز الحارة
بس دقيقة أجيب كوباية
أصب الشاي و ألف سيجارة
شيخ الحارة سعيد الشامي
عامل فيها شاويش إلزامي
بعلو الصوت بينادي عمارة
يرد عمارة مين نادى عليا
أنا شيخ الحارة يا عم عمارة
إبنك مطلوب للجهادية
و أم أمينة بقالة الحتة
تصحى الصبح من الساعة ستة
سيجارتين فرط لعم عمارة
و علبة سالمون لأم سمارة
و قمعين سكر مع باكو شاي
ع النوتة بإسم الست قدارة
و مكوجي رجل و بياع فجل
و خس و خضرة مع الكرات
متأنزح وعاملي مثقف
تقولش الواد تلميذ سقراط
و وصلة ردح ما بين فوقية
و ست أم أحمد ع الجمعية
و عم جمال سواق أتوبيس
نادر ندر في كل خميس
يعمل حادثة يا عيني عليه
مديون للهيئة بجوز فوانيس
و عم جلال عبده الحلاق
وإبنه التحش الواد حنتيرة
هو مقص في راس معاليك
تخرج من عنده بتعويرة
و أول حب وأول همسة
و أول لمسة بجوز إقلام
هم وروح بيت أبوها مفتوح
لو إنت صحيح مش أي كلام
آدي جمال الحارة زمان
أبيض واسود مش ألوان
قولوا معايا و ردوا ورايا
يا محلى جمال الحارة زمان
بقلم طارق السيد
ليست هناك تعليقات:
إرسال تعليق