🌟 فارقة🌟
سجال
عصام رمضان
فارقه إيه يعني اللي جايه
زيها زي اللي راحت
الملامح هيَ هيَ
يوم مزهزه بعده باهت
صفاء الخواجه
فارقة نعرف ديننا أكتر
وإن لينا حساب ووقفة
يوم قيامة. نخافه ربي
فارقة بين النار وجنة
عصام رمضان
لأ دي فارقه كتير حاجات
اسمعيني يا ست هانم
أحلامنا صبحت ذكريات
والضمير ف الخلق نايم
صفاء الخواجه
فارقة ضميرنا ده يرجع لينا
والفهلوة نرميها ونرجع
ندي عملنا ..الحق واكتر
نبني.نعلم . نصنع . نزرع
عصام رمضان
نبني ونزرع أيوه صحيح
يلا شوفيلي معاكِ تصريح
وإن عمرنا ضاع ف الأوراق
يقولوا احفادنا عاشوا مجاريح
صفاء الخواجه
أدعي لربك . بالتساهيل
مهما إن كان لروتينا دليل
ح نكسره والعزم .. حديد
خلي إيمانك خير خليل
عصام رمضان
باين صاحيه و مَفطرتيش
روحي هاتيلك جبنة وعيش
بس نصيحة هناك ع الفرن
مدي إديك بجنيه بقشيش
صفاء الخواجه
جايب سيرة جبنة وعيش
أكل فقيرنا فى صبح وليل
حامد ربه.. وشاكر فضله
رغم المر وطفح .. الكيل
عصام رمضان
شوفتي فتحتي الباب ازاي
دوستي بقوة كمان ع الجرح
لما اللحمة تقولنا باي
يسف فقيرنا تراب ويكُح
صفاء الخواجه
هاها ها و دي لحمة إيه
ارحمنا يا بيه.
ماخلاص بنشوفها ف تصويرة
وتوكالنا عليه
عصام رمضان
الظاهر كده والله اعلم
بتحبي اللحمه قوي يا صفاء
لما جيبت انا ليكي سيرتها
انا شوفتك زرعه وعايزه الماء
...........
صفاء
هيَ اللحمة لوحدها بس
حتى الفرخة وحتى السكر
والألبان ومعاها . البيض
برضه معانا الله وهنشكر
.....…......
🌟سجال بقلم🌟
الشاعر أ/ عصام رمضان
الشاعرة أ/ صفاء الخواجة
ليست هناك تعليقات:
إرسال تعليق