قصيدة شعر عامية
وأجمل حاجة ف الدنيا
بقلم / محمد على عاشور
وأجمل حاجة ف الدنيا
نكون مع بعض ف الصالة
و لمبة جاز بيرقص
ضوءها ف وشوشنا
و طبليه نحاوطها
و دقة بامية قرديحى
و حبة رز ف الحلة
و عيش ناشف
و نص لمونه ع البامية
و ضحكة أمى و أبويا
و قرصة أختى لأخويا
و تعمل نفسها تايهه
ومش عارفه بيحصل ايه
و إيد بتلف ف الضلمة
عشان تقرص كمان قرصة
يبص أبويا ف عيونا
يقوم الكل متظبط
و لكن ضحكة مكتومه
فى وش الكل مرسومه
وحتى أبويا متبسم
برغم الجد ف ملامحه
و ضيف يجى على بابنا
يقول لله
و نظرة أمى لابويا لها معنى
يهز أبويا ف دماغه
تقوم أمى بسرعة أوام
عشان ضيفنا اللى مستنى
و تملا الصحن بالبامية
معاه العيش و بزياده
و كوز ميه عشان يشرب
و نسمع دعوة من بره يقولها الضيف
معاها الستر و البركه
يرد أبويا مع امى بصوت هادى
يقولو امين
و يخلص صحن باميتنا
و تغرف أمى ف التانى
و بصله يدشها أبويا
بإيده الغاليه و بقوه يفرفتها
و تتوزع على القاعدين
و أمى قاعدة تتبسم
و عينها كلها فرحه
و ترمى لقمة فرفوته
لقطة جاية من بره
عشان تاكل
و لو قام حد يطردها
تقول سيبها
دى طوافه
و جاية عندنا بالذات
تبل اختى رغيف العيش
ف صحن البامية بهداوه
عشان يطرى
عشان القطة مش عارفه
تدغدغ فيه
و يتبسم أبويا و يعمل إنه مش شايف
عشان القطة بتضايقه
و تتمد الابدين تانى
و تقرص حد من جنبه
يرد اللى انقرص تاره
بدون و لا كلمة و لا همسة
يقوم الكل متبسم
على اللى بيعمله اخواتى
و إيد ممدوده ف البامية
و إيد بتحوش إيدين رايحة
و بعديها إيدين جايه
عشان تقرص
و كانت لمة العيله
تلات مرات
تلات مرات
و بعد الأكل بشويه
يلف علينا براد شاى بزهر لمونه
أو نعناع
و ممكن نشربه ساده
و بعد الشاى ف لمتنا بنحكى كلنا مع بعض
و نسمع كلنا من بعض حكاوينا
و أمجادنا
تاريخ العذبة و رجالها
جدودى ويا نوادرهم
و ستى و الكرم كله
حكاوى العمر نورثها
و نحكيها لأولادنا
عشان يحكوها لاولادهم
عشان يفتخروا بجدودهم
و يحكوها لأولادهم
ليست هناك تعليقات:
إرسال تعليق