ليه بحس انك غريبة
وامورك بقت عجيبة
وانت دايما الحبيبة
شاغلة بالى ليل ونهار
ليه عاشقة دمع عيني
ومن افراحك تمنعيني
ليه مصرة توجعيني
وانا بكتب فيك الاشعار
قربي مني مدى إيدك
انا الدم اللى ف وريدك
انا شاهد لك وشهيدك
بتسبيني ليه انهار
هات ايدك اتبعيني
شوفي بضي عيني
انتي برضو بتبيعيني
سلعة بايرة للتجار
حبك انتي لي زاد
جوة قلبي والله زاد
ليه بيعاني ف المزاد
وراضية بارخص الأسعار
شوفتي رؤية الشهر العقاري
اللى معاها تعبي ومراري
انت ناوية على انتحاري
وتدفنيني في قلب نار
انا ابنك انا دينك
اللى بيسدد ف دينك
انا زارع فدادينك
وانت حارماني الخَضار
ليه مطول فيك حدادي
ولامتى فيك حدادي
سلمتى عشي للحدادي
حلمي من العش طااار
نفسي البسك طرحة فرحنا
والسعادة تاجي في ريحنا
ونلملم توب اللى جارحنا
ويضحك لك من تاني النهار
بدوي محمد
الثلاثاء ٢ مارس ٢٠٢١
ليست هناك تعليقات:
إرسال تعليق