سجال
⚡"رنة خلخال"⚡
بقلم الشاعر م. محمود الحريري
الشاعرة أ. صفاء الخواجة
----------------
م. محمود
خَلخالها بيعزف أنغامه
على صوت خَطوتها..
وقلوب بتدوب كده قدامه
على صوت ضحكتها
أ. صفاء
رنة خلخال اللي تحبه
مليانة أنغام
بتدغدغ قلب اللي سامعها
رقة وأنسام
م. محمود
رنته بتصحي الشوق فينا
وتقول حكايات..
والفرحة تنور ليالينا
ومعانا تبات ..
أ. صفاء
رنة خلخال اللي سامعها
بتقول يانايات
أتعلم مني اللي عازفها
ويقولها ساعات
على أورج وطبلة وأغنية
واحلى الرنات
م. محمود
والأرض اللي بتمشي عليها
تصبح بستان..
والنظرة اللي تبان ف عنيها
تِروي العطشان..
أ. صفاء
رنة خلالها فى مشيتها
يحميها المولى اللي حارسها
سبحانه الخالق . صورها!
بجمال وعطاها اللي صاينها
م. محمود
رنة خلخالها بنسمعها
أجمل ألحان ...
والضحكة الغايبة ترجعها
مليانة حنان ...
أ. صفاء
ياجمال خلخالها مع اللفة
وعينيها وكُحلها.. ومداسها
بتخلي الكل.. بيتغزل
وبيوصف.. لجماله قوامها
م. محمود
الرنة بتسحر ف قلوبنا
وتدوب الروح..
وتبدل بالراحة تعبنا
وتداوي جروح..
أ. صفاء
رنة خلخال.. الفلاحة
ع الأرض الخضرا بتتمخطر
إسم الله عليها وخطوتها
تستاهل تدلع واكتر
م. محمود
تمشي السنيورة بخلخالها
ورنته ما تروح ..
وهنفضل على طول فاكرينها
وعطرها بيفوح ..
أ. صفاء
رنة خلخال طار وياها
القلب وسلم مفتاحه
للحلوة السمرا أم ضفاير
ومعاها أهو أعلن افراحه
ياصلاة الزين
--------------------------------
⚡سجال (رنة خلخال)⚡
الشاعرة أ. صفاء الخواجة
الشاعر م. محمود الحريري
ليست هناك تعليقات:
إرسال تعليق