.....(( مش مكتوبالك )) .......
سكتي مش مكتوبالك...
انتي ليه مش واخده بالك
و مصرة عليا ترمي حبالك
..و مش شايفه غيري قبالك
كلمة واحدة قلتها لك..
سكتي مش مكتوبالك
إحنا عدي علينا القطر فات
و مر العمر حتي من سكات
من سنين راح الحنين
و ماتت في قلوبنا الآهات
مهما كنتي و كان جمالك
سكتي مش مكتوبالك
ماعاد لينا غير الاخرة طريق
واللي عدي من عملنا لينا رفيق
والندم علي ما صار من ورايا
و توبة نصوحة عن الخطايا
توبة تنفعنا وقت الضيق..
و التوبة طريقها سالك.
..سكتي مش مكتوبالك
حتي المطر
ما عاد يخضر ورق الشجر
ولا النسيم
صار الحميم وقت السحر
ليه نساند وهمنا
وليه نعاند دفة قدر
نصيحة مني
ارحلي عني و شوفي حالك
سكتي مش مكتوبالك
إرفعي عيونك
و إطلعي من غير عتاب
من غير كسوف
حتي إرفعي لحظة الحجاب
و اخلعي النضارة
و اقرأي العبارة بلهجة صواب
تعرفي حقيقة سكتي
متلاقي فيها مسالك
سكتي مش مكتوبالك
هتلاقي العمر
عدي بالصبا ويا الشباب
و الجسم مني
انحني و حتي الرأس شاب
واللي يقولك غير كده
يبقي العقل منه يا حبيبتي غاب
و ف حقي و حقك برده عاب
و كتير بعين قوية يقولها لك..
إيه جرالك ..سكتي مش مكتوبالك
و انتي أميرة زهرة صغيرة
من طلتك نشوف العجب
الشمس
عليكي بتصبح من غير لهب
و الزهور
في إديكي تفتح وتقول وجب
حتي الطيور علي الشجر..
في حضرتك تغني أحلي طرب
من ضي طلتك ..وزهرة شبابك
وانتي مش واخدة بالك
سكتي مش مكتوبالك
احنا من كتر اللي انكتب .
وعلي الجبين أبدا ما انشطب
سنين طويلة غربة و صخب
و القلب ما عاد يتحمل تعب
لو رمينا بحمولنا ع الشجر
من الهموم يصبح حطب
وانتي ... مش واخدة بالك .
.سكتي مش مكتوبالك
★★★★★★★★★★★★”
د/عمر عبدالجواد عبد العزيز
ليست هناك تعليقات:
إرسال تعليق