الشاعر / رضا البوشي
صورة بالالوان
ندهت عليا الفرش
وبترقص الألوان
كان نفسي ارسم لها
صورة بالالوان
وفضلت اقص
وارص ع الألواح
كل النقط النبض فيها شهيد
كل الخطوط حاضناها الف صباح
ومفيش مقص
شغلته قص
الجراح
رسمت عصفور نملة
والصورة بقت كاملة
عينين زي القمر
موناليزا
كليو باترا
السنة لولي لكن ضحكتها
زي الشتا باردة
وتحت الحاجب
رسمت علامة إستفهام
جواها كل البشر
ساكتة كما الليام
حزن السنين متحوشين
جوه العينين
في الصورة
على كتفها طفل أمير
وابتسامته زي البدر
فى الحواديت
فارس
لوحده في الفضا
أحلامه
شوال محبة
ومرتبة
ينام عليها الشقيانين
سلاحه حجارة فتاكة
سهام صواريخها جبارة
بتقسم العدو نصين
رصاص العدو خيبان
ومش قادر على الكتاكيت
لا الطيارات تقدر توقف طير
ولا المدافع تقدر تطفي النور
الفجر صبي عفي مزروع
فوق الإيدين
بكى سن القلم
صرخ
من صرخته
نزلت دموعي لوحدها
وبكيت
بلت دموعي الورق
والصورة لونها اتحرق
وكأن دموعي مخلوطة بالكبريت
حتى يا قدس
جوه
الصورة مشتعلة
كان نفسي ارسم لها
صورة ولو بالزيت
كان نفسي ارسم لها
صورة بالألوان
ليست هناك تعليقات:
إرسال تعليق