رداً على قصيدة الشاعرة القديرة
أ.صفاء الخواجة
Safaa Elkhawaga
"كتير عليك"
أقدم قصيدتى المتواضعة
"مقدرش أنساكي"
------------------------------
كنتِي نجمة في العلالي
وكنتْ باحلم تكوني ليا
أيوه كنتِي كتير عليا
بس قلبك عمره ماكان
لعبة ف إديا...
ولما شوقِك كان يجيبِك
كنتْ باشيِلك جوه عنيا
أيوه كنتِي كتير عليا
بس قلبك كان ناداني
ولما جالي وعاش في ضلي
نَوَّر حياتي وطوى أحزاني
قلبك عمره مايبقى رخيص
لما يضحى براحته عشاني
أنا طول عمرى بَاعيش بطبيعتي
هى دى طيبتي كمان وحناني
بس اللي انتي متعرفيهوش
إن كلامهم غِل أراري
وكل هدفهم فُرْقَة مابينَّا
ولانتصالح أبداً تاني
أيوه كنتِي كتير عليا
وعمري مافرطت فيكِي
ولا كنت بافهم ف الملاوعة
أو في مرة قسيت عليكِي
بس ياحسرة قلبي عليكِي
لما قتلتِ الشوق جواكِي
وصدقتيهم لما قالولك
إنى هابيعك وانسى هواكِي
دانا مقدرش أعيش من غيرك
ولا أقدر أبداً أنساكِي
----------------------------------
بقلم : / محمود الحريرى
ليست هناك تعليقات:
إرسال تعليق