أسعار الطماطم والخياربقت نار
جنون الأسعار وشقاوة الأشعار
...
سوق الخضار اتهبل.. واسعاره صبحت نار
والناس جرالها خبَلْ ..من لعبة التجار
والست أم العيال.. م الحيرة عقلها طار
إزاى توكل ولادها.. وتعمل غدا جوزها
مع إنه راح يشتغل ..من غير لبن وفطار
...
أنا شفت بنت قبالى .. سبحان الخلاق
خدودها مثل الطماطم ..بتلخبط المشتاق
أما الصوابع جميلة ..زى قرون بامية
و فى إيدها كيس م الخيار.. بتشاغل العشاق
...
أنا قلت أقرّب عليها ..يمكن آخد قَطّه
مانا برضه نفسى ف طماطم ..وسعرها شَطّه
حبيت أغازل جنابها ..وآخد طمطماية
بصّيتلى بصّة غريبه.. وبقيت أنا ف ورطة
...
أنا قلت للحلوة ممكن ..ترمينى بخياره
أروى بها حرّ قلبى.. يا جميلة الحاره
ضحكت وردّتْ وقالت.. إبعد ياواد عَنّى
كان غيرك أشطر ياروحى.. بطّل بقى شطاره
...
آهٍ وآهٍ يا قلبى.. من الطبيخ محروم
ولا عدت أدوق المسبّك.. ولا حتى طَشّت توم
وصبح طبيخى ياناس ..راسين بصل ناشفين
يعوموا وسط المياه ..بدون خضار ولحوم
رفعت محفوظ-الاسكندرية
ليست هناك تعليقات:
إرسال تعليق