سفينة :
@@@@@@@@@@@
يادنيا ماشية
زى السفينة
ركبنا فيكى
وسايرة بينا
ساعة أمل
ساعة ضياع
ساعة ف مدينة
إمتى ركبنا
فوقك وجينا؟
ازاى ركبنا
إزاي مشينا ؟
لو افتكرنا
أو نسينا
سايرة بينا
@@@@@@@@@@@@@
بحرك غريق
بحر الزمن
مليان دموع
مليان شجن
دموع لقا
دموع فراق
فى كل مينا
وغصب عنا
وإيه بإيدنا
لايفيد بكا
ولادموع
مهما بكينا
مينا صبا
مينا شباب
مينا فرح
تيجى علينا
نلقى الهوى
نلقى قلوب
تنده علينا
وف لحظة بيروح الشباب
وف لحظة نلقى الشعر شاب
وتضيع حياتنا من ايدينا
نبقى فى لحظة ذكريات
حبة ورق على شط فات
لو كان طلع
أو كان نزل
او غاب ومات
وانتى يادنيا
ماشية بينا
على الف شط
والف مينا
@@@@@@@@@@@@@@
على موجة عالية ....سايرة بينا
والكل ساكن ,,,,فوقك كابينة
وانتى اللي ماشية... ليل نهار
وناس بتنزل ...وناس بتطلع
وناس تموت ..... مابين ايدينا
وتترك الحسرة بقلوب
ودموع شجن ...مالية عنينا
@@@@@@@@@@@@@@@
قابلنا ناس.... وفارقنا ناس
حبينا ناس .... وكرهنا ناس
والكل ماشى ...نفس الطريق
لو كان عدو ....او كان صديق
لازم هايشرب ..فى نهايته كاس
مهما هربنا .. او جرينا
الدور يادنيا ....جاي علينا
@@@@@@@@@@@@@@@
ياخوفى منك ياسفينة
مهما مشيتى
وسرتى بينا
وطفتى بينا بلاد لقا
وبلاد فراق
رحلة
ومكتوبة علينا
هاتوصلى
آخر المشوار
وابعد انا عن اهل الدار
وتتركى راكب غرقان
تايه فى بحر مالوش قرار
تايه فى بحر
مالوش شطوط
ولا أي مينا
@@@@@@@@@@
يوسف الخواجه
ليست هناك تعليقات:
إرسال تعليق