⚘يعود إنسان⚘بقلم الشاعر/ د.نشأت عادل

 ب اشوف الدنيا وانا زعلان 

محيط غضبان.. موج ثاير كما النَّوَة.. 

ب تتسرسب وتتلوى.. 

فى عُمق العُمق.. عيونهاالزُرق..

كَحَّلها الغضب ب سَوَاد..

ملاها عناد..

ف بَدِّل زُرقَها بِ حَمَار

بَقِت تِنِّين ب يَنفُث نار..

غَضَب و انصَبْ..

ع البرد اللى صاب القلب..

فَ حَوِّل كل حاجة جليد..

و إحساسنا ملاه التلج..

أحلامنا بقت ذكرى..

آكام وركام..كام فكرة

رَكَنَّاها..رميناها 

فى أبعَد دُرج..

يا شَط بعيد مالوش مَرسَىٰ..

رِيَاح اليأس غَلَبِتنَا.. 

ف حَرَمِتنَا..

الوصول ل البَرّ..

عِشِمنَا المَركِبَة تِرسَىٰ..

ف رَسِّتنَا فى قاع البَحر..

قروش فَتَّاكة ب تهاجم..

جَمَاجم بَحَّارين ماتوا..

عاشق ضَحَّى ب حياتة..

فى لحظة يأس..ضاع حُبُّه

ف مات الحِس..جوه القاع..

ملانه الرمله ب الأوجاع..

أمانى إنتهت ب الوأد

قاع البحر أصبَح لَحد

جراح إتحَوِّلِت أشباح..

أرّوَاح ساكنة ف الأصداف

لا هى ظاهرة ولا ب تتشاف

ريح خَوَّاف..

ب يداعب شراع مَتقُوب..

آثام وذنوب..قلوب إتبَدِّلِت 

ب الطوب

مراكِب ماشية ب المقلوب..

شراعها ل تحت..

ب تفحَت ل الجمامجم فَحت

دراع الأُخطبوط ماسك..

فى حلم الخَلْق..

لا ب يرحَم ولا ب يرِق..

وضوء البرق ب يعافر..

ف موج كافر..عشان يِتشَق..

ف يكشف عَتمِة المَيَّه..

تتكَسَّر حدود الشوُف..

ويحرق مصَّاصين الدم..

تِتحَرَّر أيادى الحِلم..

يفوت من دايرة المألوف..

نروق ونفُوق..

ترمى لنا الأمانى طوق

ف تِنقِذنَا من الغَرَقَان..

توَصَّلنا ل بَرّ أمان..

نرجَع تانى ل الإيمان.. 

ب سِرّ الكون..

وعَظَمِة من يقول ل الشيئ

 كُن..ف يكون

إيمان مُطلق ب رب حنون

نفخ فى الطين..ف صار إنسان

أَسجَد له ملائكته..

آدم كان صَنعَتُه

ضَل و تاه..

نزل ع الأرض مع حوا

بَعد ما الشيطان غَوَّاه..

تاب لله..

غفرله المولى واداله 

ب توبتة حياة

سَخَّر له الوجود كُلُه..

معاه حوا كما ضِلُّه..

ونيس وجليس..

جنبه الشيطان إبليس..

 يوسوس لُه..يصور له

ب إنُّه حبيب..ف ينسى إنه..

ب يضُلُّه..

يتوب ويؤوب..

يرضى العبد ب المكتوب..

يِطَهَّر مالذنوب تُوبُه 

ف يرجع تانى توبه نضيف

يدخل قايمة التصنيف..

             يَعُود إنسان

        د/نشأت عادل