🦋نفسي أقولك🦋بقلم الشاعر/ نشأت عادل

 نفسى اقولك حاجة واحدة

إنتِ جاحدة.. والله غالب

المشاعر.. رايحة جايه.. 

كنت شاعر.. حَب حَيَّة

كل حَيَّة ليها حاوى.. 

        الثقة أُس البلاوى

قال وكُنَّا ف يوم حبايب!!

كنت فاكر عقلى حاضر

كان ساعتها العقل غايب 

حُبِّى ليكِ كان سذاجة

فاهمه حاجة؟!

إنتِ مش محتاجة شاعر

ثروته حبة مشاعر..

قَلَمُه جاهُه..

شِعرُه واخد إنتباهُه

إتجاهُه راح ل يَمِّك..

عَجَبُه شَكلِك 

طَبّ حَبِّك..

عُذرُه إنُّه ما شافش قَلبِك

قَلبُه فاشل..مش مذاكِر

حَب مَنظَر..فاتُه جَوّهَر..

حَط حُبِّك ف المُقَرَّرّ

إكتَشَف فجأة إنُّه لاغِى..

شالها مادَّة..حُب طاغى..

بس شيلتِك من دماغى..

والأَكَادَه..كنتِ عادة..

شئ زيادة..مالوهش لَزمَة

عَمَلِّلى أزمَة..و مُخِّى جَزمَة

كان ب يحلم ب السعادة..

طَعم حُبِّك كان زيادة

شِرِبت مِنُّه لَقِيتُه ساده

             بقيتِ قهوة

              لوحةحلوة 

      كان غرامك أحلى غِنوَة

            لقيتُه رَغوَة

اتكَوِّمِت فوق سطح هادى

فجأة هَبِّت ريح شالِتهَا..

و الفُراق بقى أمر عادى

نسيت أقولك..

قلبى كان غضبان عليكِ

ب ادعى ليكِ

..

ب قلب راضى..

الله يسهلِك.. 

ح أنسى حُبِّك وانسى عِشقِك

           إزاى اعشَق

           جسم فاضى

       د/نشأت عادل