وَقْفَة
_____
لو كُنْت عارْفَة وقْتَها إِنّ دي كانِت بِدايَةْ
كُنْت جِبْت مِ النِّهايَةْ
وِاخْتَصَرْت!!
كُنْت قَصَّرْت الْحِكايَةْ
كنْت حَطّيت النُّقَط فوق اِلْحُروفْ
_ مِحْتَارَة ليه؟!
ماكْفايَة خوفْ!!
ِمالِّلي عَدَّىٰ راحْ خَلاصْ
وِالِّلي جَيّ فْ ضِلِّ بُكْرَةْ
لِسَّه بِالْنِّسْبالِي فِكْرَةْ!!
لِسَّه نَبْتَة فْ قَلْبِ بِذْرَة
عِلْمَها في عِلْمِ رَبِّي
آه يا قَلْبي!
ليه بِتِحْزَن؟!
طَبْ ليه يابالي تِنْشِغِل
وِتْبات مِحَيَّرْ؟!
ِيَا عَقْلي ليه عَمَّال تِفَكَّرْ؟!
ِ
شايْلَة ليه الْهَمِّ بَدْرِي
ماتْعيشيها !!
بِتْلومي رُوْحِكْ ليه عَليْها؟!
لَحْظَة تِسْوَىٰ الْعُمْر لِيْه بِتْضَيَّعيها وْ
تِرْجَعي تِبْكي عَليها؟!
فْرْصَة جَتْلِكْ ما تْسِبيْهَا
تَبِّتي بِإْديكي فيْهَا
ماتْسِيبيش حِلّمِك يِروحْ
طُول ما لِسَّه فيكي رُوحْ
خَلَّصي حَقِّكْ، خُديهْ
ماتْسيبيش عُمْرِكْ يضيعْ
وِيتْسِرِقْ مِنِّك أمانِكْ
عافْري بِإْديكي وْسِنانِكْ
واللي بيراهنوا عليكي
ان مَرَّة حاوْلواْ يْعَطَّلوكي
هَمِّشيهُمْ!!
صُمِّي فِ عْنيهُم وِدانِكْ
غَمَّضي عَنْهُم عِنيكي
واِنْ قالواْ عَنِّكْ مِشْ هَتِقْدَرْ
طَنِّشيهُمْ
حتَّىٰ مَتْرُدِّيش عَليهُمْ
وِفْ قَرارِكْ.. قولي هَقْدَرْ!!
لوْ قِدِرْتي هَتِغْلِبيهُمْ!!
حبيبة سلام
كل الشكر والتقدير لصديقتي الشاعرة المبدعة صفاء الخواجة. دمت ببهاء طلتك ورقي إبداعك حبيبتي
ردحذف