أنا كنت محبوسة ف أوم أوم
وقلت اشم الهوا برااه
يادوب فتحت بإيدي الباب
هبت رياح صدمتني معاه
وبعيني شوفت الناس ألوان
وشوش وزيف عايشين وياه
وكل مابقابل موسى
يطلع لي فرعون من غير جاه
واللي يبان لك م الزهاد
تلقاه مداري حقيقته وراه
وجيت اسقف بإيديا
الرنه راحت من كفي
والشمس صبحت شبه جليد
ماعادتش ف البرد تدفي
حتى المطر مع حباته
لابيروي عطشي ولايكفي
أما العسل طعمه مراره
مبقاش مكرر ومصفي
وجابولي للجرح الترياق
مبقاش يداوي ولابيشفي
قلت ارجع الأوم أوم تاني
دا العيشه جواه بتدفي
**********
قصيدة/ الأوم أوم
الشاعرة/ منى احمدعبدالنبي
عضو إتحاد كتاب مصر
ليست هناك تعليقات:
إرسال تعليق