ناديت عليه
*********
ناديت بعلو الصوت
وقلت فين أراضيه
منايا اعرف طريقه
والله نفسي اراضيه
واسأل عنه الخلايق
وانا كلي لهفة عليه
وزُرت كل الأماكن
يمكن ف يوم ألاقيه
******
وف يوم وانا باسأل
سمعت صوت رقيق
بينادي وبيحكي
من غير صريخ وزعيق
ياللى حبيبك فاتك
ومتعرفلوش طريق
مستني تجيلك منه
كلمة تِبِل الريق
خد مني كلمة تفيدك
من غير كمان تزويق
اللي ما يسأل فيك
عمره مايبقى رفيق
******
بعد المنادي ماقال
عن اللي خان الوعد
وسمعت كلامه بعقلي
وكلامه عجبني بجد
وعرفت إن اللي خدعني
يستاهل مني الطرد
والهجر كمان يستاهله
أصله مابيصونش العهد
وإن صادف يوم ورجعلي
ودموعه تسيل ع الخد
مش هاسمع منه بقلبي
ماخلاص القلب اتسد
---------------------------
بقلمي؛
م/ محمود الحريري
ليست هناك تعليقات:
إرسال تعليق