"خفة دمك"
سجال دويتو
للشاعر م. محمود الحريري
والشاعرة أ. صفاء الخواجة
----------------
م. محمود
خفة دمِّك ملهاش حد
ومفيش أطعم منِّك حد
أ.صفاء
خفة دمي نايات على ورد
فيها أصالة ومالهاش قد
م. محمود
انتي مفيش زيِّك في الدنيا
جوه عيونِك سحر بجد
أ. صفاء
اصل عيوني جمال رباني
متكحلة وكلامها السعد
م. محمود
شفت جمالِك تُهت ف ثانية
ياللي خدودِك زي الورد
أ. صفاء
غنولي ياما وزادوا اللحن
بس ماقال ف كلامك حد
م. محمود
خفة دمِّك بتدوخني
وكل كلامِك زي الشهد
أ.صفاء
سيبك بقى من خفة دمي
كل كلامك أنا اخده بجد؟
م. محمود
كلمة قوليها تريح قلبي
وتدفيني في عز البرد
أ. صفاء
أنا م باقولشي وسايباك تفشر
كل كلامك ناقصه العهد
م. محمود
سيبي إيديكي حاضنة إيديا
وأنتي تلاقي معايا السعد
أ. صفاء
لا لا.لا. لا لا لأ
ومتخلطش هزارنا بجد
م. محمود
خفة دمِّك شئ مش عادي
وعليكي ضحكة مش على حد
أ. صفاء
أنا من يومي م احبش أهزر
بيني وبينه بنيت السد
م. محمود
خفة روحِك حاجة جميلة
خليتني لحبك باتْشَد
أ. صفاء
أي أصيلة كمان ربوها
متصدقش كلام الود
م. محمود
ممكن اروحلِك آخر الدنيا
لو حتى هتوصلي للهند
أ. صفاء
مش محتاجة لسند وهند
أُاقصد بيت الخال والجد
م. محمود
وأقطف كل ورود العالم
لَاجْلْ اعمِلِّك أجمل عقد
أ. صفاء
لما ح تقصد.. بيت الأهل
ح يمضوك على قايمة وعقد
------------------------------
بقلم الشاعر
م/ محمود الحريري
والشاعرة
أ. صفاء الخواجة
ليست هناك تعليقات:
إرسال تعليق