وِش بُوم
ــــــــــــــــــــــــــــــــــــــــــــــ
يَا اللي عَامِل فِيهَا عَنْتَر
إِنْتَ أَصْلاً كُوم تُرَاب
فَاكِر اِنْتَ انَّك مِسَيْطَر
وِش بُوم انْتَ وْغُرَاب
مَهْمَا تِقْتِل أَوْ تِهَجَّر
فَانْتَ فَارِغ مِ السَّرَاب
كُلّ يُوم بِتْبَان لِي أَصِغَر
فِي الدَّنَاءَه السَّهْم صَاب
يَا اللي عَامِل نَفْسَك أَشْطَر
دَه انْتَ عَيِّل أَصْلُه خَاب
فِيْن دِمَاغَك لَوْ تِفَكَّر
رَاح تِلاَقِي الوَقْت شَاب
يَا اللي قَافْل العِيْن مِسَكَّر
دَه انْتَ هَتْعَايْن العَذَاب
يَا اللي حَظَّك لُونُه أَخْبَر
بِالشِّمَال هَتْشِيل كِتَاب
بُكْرَه رَاح تِتْمَنَّى تِرْجَع
وِانْتَ مَوْقُوف لِلْحِسَاب
مَهْمَا تِعْلاَ اللهُ أَكْبَر
يَا اللي مَخْلُوق مِ التُّرَاب
يَا اللي عَامِل فِيهَا عَنْتَر
إِنْتَ أَصْلاً كُوم تُرَاب
فَاكِر اِنْتَ انَّك مِسَيْطَر
وِش بُوم انْتَ وْغُرَاب
ــــــــــــــــــــــــــــــــــــــــــــــ
كلمات الشاعر أحمد شاهين
----- مصر - أسيوط -----
ليست هناك تعليقات:
إرسال تعليق