يااااه.... بيقولك مطلوب في سجال
موضوع مكتوب اسمه. ( نِفسي )
هو اللي ف نفسي هايتقال ؟!!؛
وعموماً..هاتكلم واحكي...
أصلي اللي ف نفسي انا فيه...نفسي
تلمسُه إيدي وعيني وحسي
واقنع نفسي إن انا فيه فعلاً
وشايف شيء قرب من وصفي !
أصل انا عايش عمري اتمنى
أحلم واصبر واصرخ وابكي
وما فيش حاجة إيقاعها اتغير
ف بقول فايدته ايه لو هاحكي ؟!
ويا دوب بس حِفان الصبر
أصغر م الدنيا اللي تحير
وهاقول إيه !! تعبان قلبي
شاكي وباكي وكمان نِفسه......
نفسي بجد فى لحظة أدوب !
زى التلج ما يرجع مية
أو إني اتحول لسراب
ولا لُه مٓعلٓم ولا شخصية
واختفي من دنيا الأوجاع
بس اختفي وأروح على فين ؟؟؟!
وده نفسه هو اللي تاعبني
وبيزود فى ألامي أنين
عايز اغمض حتى ما اشوف
واحذف كل حروف الخوف
ولا أسمع عن ظلم ويأس
وأغير سيستم معروف
ياااااه...
وسعت مني
وشرد ظني
وفضل يمشي ويمشي ويسرح
ونسيت إن ده
كله.....
في نفسي. !!!
أسماء عبد الله
ليست هناك تعليقات:
إرسال تعليق