كلام مساطيل ....
قال بيقولوا لغوا الواسطة
و الكلام باينه صحيح
حتى الكوسة كمان اختفت
و صبح الباشا زي الأسطى
طب إختشي و بلاش تلميح
دي درجات السلم تسمع و تسلم
بتلاقيها باسطة فوقيها باسطة
من غير تريقة بس و تجريح
عايز تقولي إبن الخفير
هيبقى زي إبن الوزير
و يتعين لو جاب تقدير
و يدخل نيابة و شرطة !!
ده انت باين عقلك صفيح
و هتجيب لينا ورطة
صدقني كلنا بقينا واحد
و مساواة في الجيل الصاعد
و المحسوبية عملوا ليها ضريح
و التعيين هيكون بمسابقة
بشرط ما يكونش مجرم
او بلطجي او عنده سابقة
و لو متظلم ..فيه إعادة تصحيح
و اي ارض زراعية
بتجري فيها المية
ممنوع تبني عليها يا ابن بهيه
و إلا .. الأكل هيبقى شحيح
و أي ابراج مخالفة
لازم تشوف صرفة
الناس كلها حالفة
ما يكون ليها تاني تصاريح
و لا هيبقى فيه شنط و كراتين
من صاحبك زفت الطين
و لا يشتروا الأصوات بلحاليح
أنت باين عقلك إنفجر
قوم نضف الشيشة و غير الحجر
و سيبنا خلينا مجاريح
طيب خد دي كمان ...
أي مسئول مهما تقول
لازم يبقى
عنده ضمير
يختشي و لا يرتشي
و سواء صغير او كبير
اي إختلاس أو تقصير
هيروح ورا الريح
طيب يا فصيح. إعملك همة
و كفاية تلقيح ...
أما كلام مساطيل بصحيح .
★★★★★★★★★
د/عمر عبد الجواد عبد العزيز
ليست هناك تعليقات:
إرسال تعليق