تعليق سجال على كلاكيت سوق الرجال (٤) :-
(٤)
----------+++ سُوق الرِّجال +++----------
سُوق الرجال بوابْتُه العَـاليه فاتحَـه مَزاد
رَسَّت عَطَــاها فى الرُّجُوله لمِن عَلَّا وزاد
زى حُب الحَبيب لمَّـا عَلَّا لحَبِيبْتُه مَهرَها
الفَاتحَه بَوَّابِة قلبَها ... مَفْروشَه بالسِّجَّاد
د. سمير خليل
➖➖➖➖➖➖➖➖
الشاعر مهندس / محمود الحريري
سوق الرجال مليان.. من كل صنف ولون
بس اللي غالي فيه.. راجل رزين موزون
يعرف معنى الكلام.. عارف طريقه زين
ولا عمره باع أو خان .. وللعهود بيصون
د. سمير خليل
سوق الرجال منصوب ... لراجل عرض وطول
وبذمة عيارهـا دهب ... مالها مـثال ف القول
والسوق جواهرجى ... ميزانه حساس بالميللى
عمره ما قالك وقاللى ... دهبك قشره ومصقول
➖➖➖➖➖➖➖➖
الشاعر / أحمد سالم
قرب ونقى يا باشا الرجالة مش بالكوم
اوعى تغرك المظاهر ياما مدرية هدوم
فيه اللى عامل شريف ويبيع لو حتى أبوه
وفيه اللى الدين يوجعه وميشوفوش النوم
د. سمير خليل
سـوق الرجال اختار م الكُـوم
الخفِيف حِـمله والغـالى السُّوم
سَمِح البيع والدِّين عنده العار
مذَلَّه بالنهار ... وف لِيلُه هْموم
الشاعر / أحمد سالم
سوق الرجال اتنصب ولادونا الادو
معانا رجال للبيع على كل شكل ياهو
معانا اللى باع وطنه عشان قرشين
ومعانا اللى يفديه بروحه حتى لو شنقوه
د. سمير خليل
سوق الرجال منصوب ع الذِّمه
وبايع وطنه لو دخله يلبِّسُه العِمَّه
دا الطيور على شكلها ولونها تقَع
فما بالنـا الجَدَع ... الخاين ورِمَّه
الشاعر / أحمد سالم
وزى م معانا راجل جدع معانا كتير اندال
هنبيعهم بالخساره عشان موقَّفين الحال
معاك يجروا وراك ممعكش فص ملح وداب
محتاج كام واحد ياباشا نحطهم ف شوال
د. سمير خليل
يا ما هناك جدعان ورجال
عند الجد يلاقوك ف الحال
سيبك من أنصاف المَرجَـله
المَخْذلَه ... عند رَد السؤال
الشاعر / أحمد سالم
معانا شباب عاطل مش عارف يطول يعيش
ضاع أمله ف التعيين وكمان مخلَّص جيش
لو ف كافييه هيسد أو حتى يقف بواب
مش طالب غير أكل وشرب ويشتغل ببلاش
مزادنا خلاص هيقفل ونبيع برخص التراب
ندل وخابن وغشاش وفوقهم تاخد كداب
وفيه رجاله ولاد أصول وطبعا مش للبيع
وتبقى أمك داعيالك لو بقوا ليك أصحاب
د. سمير خليل
سوق الرجال للى طموحه عنان
الشاب العاطل أصلًا واد كسلان
عايز يقعد جنب مامتُه والخلان
السفر حركه وبركه بس يجرب
ف بلده ولا يتغرب... ولا يتهان
الشاعر / أحمد سالم
العيب مش ف الشباب لكن ف التعليم
عمال يخرج ملايين جاهل تقولش بهيم
خاص ومفتوح مدام بفلوس أبوه بيروح
لو اتعلم له صنعه كان بقى اسطى عظيم
د. سمير خليل
العلم للى عايز يتعلم يكون
أحسن عالم يشوفه الكون
زى زويل ومشَرَّفَه ومَجدى
بعَلام بلدى ... للعلم ماعون
➖➖➖➖➖➖➖➖
الشاعر/ إبراهيم شيمر الجندي
سـوق الـرجــال اتـقـفـل
مـفـتـاحـه غــير معلـوم
واللى فاضل فى السوق
ناس كسر مـاليها لـزوم
يـاخسـارة اللى اشـتـرى
طول عمره عاش محروم
اصل اللى بـاع الـجـدع
عمـره مـاكان لـــه كــوم
د. سمير خليل
سوق الرجال لو اتقفل يوم
الجدع يفتح فسُورُه خروم
ويبيع للمشترى مِنُّه جدعنه
والأنا ... تعَبِّيلُه أحسن كوم
➖➖➖➖➖➖➖➖
الشاعرة / حنان عيد
سوق الرجال دوار
فــ الأصل ماهتحتار
أما اللي منه عويل
يرويك كسات المرار
عجببببببى
د. سمير خليل
فى سوق الرجال ما دَّوَّر ولا تِحتار
وفَّر عليك أسواق تانيه فيها تِختار
دا صَنف واحـد ما فيش أبدا زيُّـه
ورَوِيَّه ... كاسُه حلو معَطَّر بالأزهار
الشاعرة /حنان عيد
سوق الرجال ...فـالسكه عدي وشيل
فيه الرجال الزين ....تعرفه بالعين
وفيه الرجال قيمه مرسوم وتقيل
وفيه رجال الوان بالوراثة عاطلين
وفيه اللي قلبه كبير يميل الزمن مايميل
عجبببببببببي
د. سمير خليل
هوا دا السوق الصَّح
معاه عُمرك ما تكُـح
لكن السـوق البَرَّانى
حا تقول يانِى...وبَح
الشاعرة/ حنان عيد
سوق يتقاتل عليه لرجال
عرفته ...وكنت ليه رحال
شفت فيه النداله الوان
كل اللي فيه خوان ... مفهش صنف رجال
عجبببببى
د. سمير خليل
مش أى سوق لرجال
والعارف يعَرَّف الرَّحال
حط رجلك مكان ما تحب
وما تدِب ... ف الأوحال
الشاعرة/ حنان عيد
في سوق للوحل بس اللي فيه اندال
ابعد عنه لو جبولي المايه في الغربال
طريقهم كل طين متعاص
وانا للأصيل طبعي يكون ميال
عجبببببببى
٢٤ تعليق سجال من الشعراء على كلاكيت (٤) للدكتور / سمير خليل من:ـ
الشاعر مهندس / محمود الحريري
الشاعر / أحمد سالم
الشاعر/ إبراهيم شيمر الجندي
الشاعرة/ حنان عيد
خالص تحياتي لهم وتقديري
ليست هناك تعليقات:
إرسال تعليق