حقيقة وحلم
----------------------------
ياحقيقه كانت وهم...
وحلم من الأحلام
قلبى كان بيك ياحلم
بيرفرف كما الأعلام
صحيت لقيت الحب
رَسّمَّه على ورق ريكلام
ما الحب حقيقته حلم
ياخساره سابنى وطار
كأنه كان محبوس
جوا غِيِة حمام
قلبى كتير ناداه
أتاريه أخرس أصم
ولما رجع كان قلبى خلاص
إتملى حزن وهم
لسانى حاول يقول ....لكن
تاهت حروف الكلام
واصبح مفيش بينا .......
حتى كلمة سلام
قعدت أداوى القلب
م الحزن والآلام
ومعدتش فيه إشتياق إلا
على اللى فات... من الأيام
أيام ما كنت عايش
حياه بلا أحلام
ولما جالى اخدنى
لبحور غم و هم
وكان بيضحك عليا
وهو فى حالة إنسجام
اتاريه بيلعب بقلبى
بلعبة الأوهام
ولما عرفت الحقيقه
لقيتنى معاه فى صِدام
سبته انا المره دى
وقلبى جرحه لمّ
ولما قلت أحب
النبض قالى إيه
ح تعيد الوجع تانى
وألا إيه ياعم
---------------------------------
عبدالفتاح حسين والى
٢٠٢٥/٨/٤
ليست هناك تعليقات:
إرسال تعليق