سلوكيات مرفوضه ( مربعات )
.............
مالك تغلـّـس يا واد يا حِنكش
وانت اللى عمّال تهرى وتنكــُـش
عامللى غاغه وشغل منكــَـش
واللهِ عيب ده ع الإنسانيّـه
يا بت ياااا خضره استمنى
يكونلِك ابن مش بالتبنى
عاشق لخلفه والشوق قاتلِنى
واهو ربى عالم بكِى وبيّا
والفاضى قاعد مع اللى فاضى
ويجيبوا سيرتك وسيرتى عادى
وعن كلامهم ما تبقى راضى
ويصيبنا منهم أسوء أذيّه
تاجر وحابس بضاعته ليه
بعد امّا تغلى يقول أهِـيه
طب والغلابه هتعمل ايه
نلقاها تبقى هى الضحيّه
وابن اللى ماعرفش أيه يعاكس
تقوله عيب تلاقيه مِشاكس
عايش حياته بشكل عاكس
هوّ وصِحَابه المهلبيّه
والبنت حطـّـه عى الوش بُـدره
لاحمر ولاخضر وتمشى بَـرّه
تاكلها ميت ألف عين بنظره
خلـّـت ولادنا يبقوا ف خطيّّه
ومشيت فى حاره لبسى الجميل
إنكب من فوقى الغسيل
كانت تسيّق امُّ خليل
طب أعمل ايه فى الورطه ديّه
إبنك معاند هتعمل ايه
ما عٔدْت تستحمل يا بيه
والجيل د أعلم المولى بيه
إمخاخ وسارحه فى حته تانيه
يعنى الخلاصه ف نصّنا
ســوء الســلوك بـيــهزنا
طـب ليه نشــوّه شكلـنا
وتبان صورتنا المُـؤذيـه
يا اخوانا لو دنيتنا دى
فيها القلوب لو تهتدى
ونفوسنا تهدى ونرتضى
هنعيش حياتنا المـُنـْدِيَه
................
الشاعر / السيد خطاب
ليست هناك تعليقات:
إرسال تعليق