"وجع الغياب"
-------------------
كل حاجات البيت بتنادي
على ريحة باقية ف كل مكان
فاكرينِك راجعالهم تاني
ومعاكي حب وخير وأمان
حتى الكرسي بتاعِك ثابت
متحركش بقاله زمان
لسه هدومِك جوه دولابِك
وبتسألني عليكي كمان
وعلى الحيطة صورتي معاكي
وباصة عليا بكل حنان
كل حاجاتك لسه مكانها
وعايش بعدِك ف الأحزان
بس باحاول ابان متماسك
وانا باتظاهر بالنسيان
.................
لما الناس يشوفوني يقولوا
وقت الحزن أهو عدى وفات
وانا بَرسم بسمة على شفايفي
وجوه القلب أنين وأهات
واعمل نفسي صالحت الدنيا
وانا مهموم طول الأوقات
ده الوجع الساكن جوايا
خلاني شبيه بالأموات
نار البعد بتكوي فؤادي
وانا على طول عايش ف سُكات
..................
وجع القلب صبح ملازمني
طول الوقت ومبيمشيش
والوحدة اللي انا عايش فيها
خلت حزني زيه مفيش
هافضل اداري الحزن وامثِّل
بس عيوني مبتخبيش
وافضل عايش على ذكراكي
وطيفِك دايما ميسيبنيش
لو فيه ناس فاكريني نسيتِك
يبقوا أكيد مبيعرفونيش
----------------------------------
بقلمي ؛ م. محمود الحريري
ليست هناك تعليقات:
إرسال تعليق