أمان يا وطني
أنام الليل وأنا آمن
وابني فى حضني مدفي
وراضي بحالي متصافي
مع الدنيا ومع نفسي
في راحة بال ومتعافي
عزيز وحقوقي فوق رفي
في وطني الحر بين ناسي
بيحموا ضهري وفى كتفي
لا أنا مطلوب ولا مطارد
ولا أنا شريد و متخفي
ورب الحمد له شاكر
مقضي الفرض و موفي
ساعتها الدنيا تخضعلي
وكل نعيم لها فى كفي
.....
ينادي الفجر اصحى له
وشايل فاسي فوق كتفي
أدور رزقي واسعى له
وقسمة ربنا تكفي
براح الدنيا قدامي
وتارك همها خلفي
يشوف البحر مجدافي
ترق النسمة وتدفي
ومهما نصيبي بيعاند
بيرجع تاني وفى صفي
واصبر لو مشيت حافي
وزادي خبزه بتكفي
معاها جرعة المية
بتشفي غليلي وتطفي
وأكتر من كده عندي
يهون ولا يلمسوا طرفي
ويحلى القبر لي شافي
وأنا مدبوح ومتشفي
ولا أمد الخسيس ايدي
ولا يبتزني فى
ضعفي
أحمد محمود عوض سعيد
الرحامنة ..فارسكور..دمياط.
ليست هناك تعليقات:
إرسال تعليق