" سمك 🐳 - لبن 🍼- تمر هندى 🍺 "
( شيزوفرينيا )
▪︎ أنا نفسيا تعبان منى
▪︎ واخد موقف منى إكمنى
▪︎ نصى الأول عايش سنى
▪︎ بس النص التانى تاه منى
▪︎ مديها صرمة وهيجننى
▪︎ أصله الحيله والعين والننى
▪︎ آجى أتكلم ف المصاريف
▪︎ وإن معاشى كوكو ضعيف
▪︎ يصرف نصى التانى فلوسى
▪︎ على دخانه ويا الكيف
▪︎ أو ع الساحل وقت الصيف
▪︎ وآدى يا عالم وش الضيف
▪︎ وأما تهف عليا اللحمة
▪︎ م التسعيرة، أضرب لخمه
▪︎ يطلب سوشى من غير رحمه
▪︎ ويا كباب مستوى ع الفحمه
▪︎ عند "أبو شقرة" فرع الجيزة
▪︎ شرط الدفع يكون بالفيزا
▪︎ وأما أحتاج لى طقم سنان
▪︎ أو مستشفى لو عيان
▪︎ ويطلبوا منى تحليل دم
▪︎ نصى التانى يروح الجيم
▪︎ ويضرب موز ويا "أمينو"
▪︎ وأنا أتعشى بلقمة فينو
▪︎ الله يرحم عيشة أهلك
▪︎ عيش على قدك،أنا مش ضدك
▪︎ و إوع تفكر ف الآى فون
▪︎ حول أرضى للتليفون
▪︎ وعلى نزواتك شد سيفون
▪︎ مهما يقولوا عليك مجنون
▪︎ قبل ما نوصل لطريق سد
▪︎ ونمسك بعض ف جذب وشد
▪︎ إنسى تعد فلوسك عد
▪︎ تلقى البركة ملهاش حد
▪︎ ربك عمره ما يظلم حد
▪︎ يدى الغطا على قد البرد
▪︎ أنا راح أصالح نفسى خلاص
▪︎ وأقفل بقى بالترباس
▪︎ وإن القرد عمله عجينه
▪︎ للفلاحة، هاكون نسناس
▪︎ راضى باللى هيحصل لينا
▪︎ هارمى ورايا كلام الناس
عجبى!!!
(خالد فاروق)
ليست هناك تعليقات:
إرسال تعليق