🌴فواتير🌴
فواتير وغلاءها كتير
بتخلي النوم ح يطير
والرحمة بقت تتبخر
والبخل عاملي كبير
و مرتب.. لما يجينا
بيزوغ ويا العصافير
ومعاش مايكفي معانا
غير فول ومعاه جرجير
***
فواتير الغاز .. والمية
عايزة لها خبير بضمير
كهربة البيت.. وفوناته
محتاجة لحد بصير
والنت.. ياويلنا وويله
مصاريفه ألمها خطير
غير أكل وشرب ومسكن
ده ياعيني عليك يافقير
***
واللبس الشعبي العادي
محتاج سُلفة وتدبير
والدوا وعلاجنا لوحده
آه يالهوي على التكدير
وهنرجع تاني .. ونركب
ف كاريتة وضهر حمير
من سعر تذاكر.. باصنا
سواقه كمان ده ضرير
***
تعبان القلب وشايل
جواه أحزان ومرير
وكأنه أسير وتمامه
يتحط عليه جنزير
من كتر قساوة الدنيا
ندعيك يا إله ياقدير
تفرجها.. علينا ونبعد
عن كل ظلام و سعير
***
🌴بقلمي/ صفاء الخواجة 🌴
ليست هناك تعليقات:
إرسال تعليق