بعنوان /(( أُم الكرم ))
شوفت الحنان والدفا والرحمة والإحسان
ومهما قلبي اكتفى ...... تديني حب كمان
قلبي اتملى بالصفا ......ومن نبعك المليان
عرفت معنى الوفا ........وبقيت أنا إنسان
========================
اللى سقانى نَداه ..... قلبك ومين غِيرُه
علمنى معنى الحياة وساقني من خِيرُه
ومهما قولت الآه ......والقلب تاه سِيرُه
حضنك قوام بلقاه .....عِشِّي وأنا طِيرُه
=========================
بتحِسِّي أحزانى ....من قبل ما أحكيلك
لو قولت آه يانى .... إحساسي بيجيلك
بلقاكي جايانى ........من قبل ما اناديلك
لو توهت بلقاني ..... انا بجري وأشكيلك
=======================
روحك بتجري فى دمى وف قلبي وكيانى
من صغري فاهماني ...... عَجناني خَبزاني
وشايلة دايما همومي. وف ضيقتي سترانى
ودايما ألقَى حنانِك............... ترياق لأحزاني
========================
أمي كانت مدرسة .....ومُديرها وناظِرها
عالرحمة متأسّسة ....والعطف من خيرها
خيرها فى يوم ماتنسى ولا لاقيت غيرها
كانت الضياء للعيلة ... وسراجها ومنيرها
=========================
بعدك بقيت مهموم ... والنور طَفى فِيَّا
وبقيت كما المَحروم ومفيش حبيب ليا
غريق فى بحر بَعوم ..... والقَشّ حَوَاليا
والكون ده كله غيوم .....وعيوني معمية
=========================
دايما لحد الآن ........ عقلي سارح فيكي
فى صلاتى لسة بقول .... يارب يشفيكي
بَتخَيِّلِك وِسطنا ...... وانا تحت رجليكي
وانتى فى عيد الأم ...واخواتي حواليكي
=========================
مهما أقول وأقول ........عمري ما اوفيكي
ياشايلة عنى الحمول...... يارب يجازيكي
كان نفسي ياأم الكرم ........ربي يخليكي
لو تمشى كُل النعَِم........... أنا أكتفي بيكي
========================
يارب أغفرلي ........انا روحي كات فيها
أنا أصغَر اخواتي ....... ومحتاج أنا ليها
كان نفسي لو أقدر .......من عمري أديها
ولا إني اشوف دمعتي ..تنزل كدة عليها
========================
مهما هقول وهعيد .. مش هوصف احساسي
ولا عمرى أحِس بِعيد . ولا عمرى أكون ناسي
أبوس إيدِك سامحيني ... لو قلبي كان آسي
وإن كنت يوم قَصَّرت ..... حقك على راسي
=========================
يارب يا حنّان .............على الفراق عِينَّا
ظللها بالقرءان .............واقبل دعاء مِنَّا
واسقيها مالعدنان ..............وتمم المِنَّة
وخد إيدها كمان ...... واجعلها فى الجنة
==========================
ربنا يرحمك يا أمي
ليست هناك تعليقات:
إرسال تعليق