( على فين ياولدي موديني )
.....
ياولدي ليه بتلملي في الهدوم
وتصر في منديلي الهموم
على فين ياولدي موديني
رويتك من لبني وحنيني
وكأس الغدر بتسقيني
على فين يابني واخدني
مش كفاية الزمن خاني
ومعاندني
كنت فاكرة العوض فيك ومنك
يا ابني
كنت فاكرة إن وحدك ناصفني
عشان عارف شقاية وعارفني
ليه ياولدي بتخليني أحس بالأذية
دا أنت وعيالك فرحة قلبي ونور عنيا
حلفتك بالأمانة تسيبني هنا
أنا نسيت المرار اللي شفته
و فاكرة الهنا
يا ولدي بلاش عليك أهون
وافتكر إني شلتك في بطني تسعة من الشهور
وإني ضحكت وبكيت
وإني حتة..... من حيطان البيت
وانى أمك لو عضم في قفة
وانت أغلى اسم ع الشفة
وإني عارك مهما أكون
مين قالك ترمي أمك
مين سن القانون
أمانة يا ولد ...بطني سيبني أعيش ع الذكريات
كل حيطة وكل باب
معلم في قلبي م الحيا للمات
عشت مع أبوك سنين طوال
دخلت بيته زي الغزال
ونسيت كل البشر ....
الأهل و العم والخال
كنت عود مفرود مهما الزمن مال
سيبني عايشة على ذكريات السنين
سيبني ناسية الأسى فاكرة الحنين
فاكرة دخلت أبوك علينا
والأيدين بالخير مليانين
وصوته في الأذان
والفاتحة وسورة التين
وطبطبة ايديه ع ضهر الحزين
فاكرة برد الشتا
وصيف الليالي
فاكرة قعدت أبوك قبالي
وهو يتملى في جمالى
ويقول أحمد الله عل الخير عطاني
وحياة حبيبك محمد يا ولدي سيبني عايشة بين الحيطان
سيبني فاتحة بالمحنة كل البيبان
سيبني بين ولادك أحس بالدفا والأمان
لما أحط راسي عل المخدة وأنام
سنا الشرق
م ٢٧/٦/٢٠٢١
مع خالص التحية للشاعرة الكبيرة زينات القليوبي
في قصيدة دار المسنين
ليست هناك تعليقات:
إرسال تعليق