كتب الشاعر/ محمود الحريري ¥قالوا زمان ¥

"قالوا زمان"
قصيدة باللهجة العامية
-----------------------------
كان ياما كان وقالولنا زمان
وسابولنا حكم وكمان أمثال
فيها اللى بينفع ف حياتنا
وفيها اللى ماينفع إنسان

قالوا لنا زمان...
إن العجلة من الشيطان
ولازم نستنى ونتأنى ..
لحد ماأنتخنا وأصبحنا ..
زى تنابلة السلطان ..
****
وقالوا كمان ..
حكمة عظيمة لكل زمان
إن"النظافة من الإيمان"
بس الغريبة...
إنك لما تشوف شوارعنا ..
تلاقي زبالة ف كل مكان
بقى بالذمة دا يبقى إيمان؟
****
ويوم ماقالوا لنا مثل خيبان
"أبو بلاش بنكتر منه "
والإنسان أصبح طمعان ..
وانتشر الجشع المجنون
لحد ماضاع حق الغلبان
****
ومن أمثالنا البايخة زمان
"خالِف تُعْرَف"...
لما بقينا ف غابة تمام
والواحد يفرض أفكاره ..
حتى كمان لو كان غلطان
****
مش لازم ..كل  الأمثال
تبقى سليمة...
وتنفع كل زمان ومكان .

لازم نفهم قبل مانندم
ونصبح فجأه فى خبر كان .
----------------------
بقلم : م/محمود الحريرى